ऊर्जा खबर
काठमाडौँ । स्वतन्त्र ऊर्जा उत्पादकहरूको संस्था, नेपाल (इपान) ले भोटेकोसी नदीमा आएको विनाशकारी बाढीबाबाट प्रभावित नागरिक तथा विद्युत् आयोजनाको पुनर्निर्माण र पुनर्स्थापनाका लागि ५ करोड ५ लाख ५० हजार रुपैयाँ आर्थिक सहयोग गर्ने भएको छ ।
बिहीबार बसेको कार्यसमितिको २०६औँ आकस्मिक बैठक तथा सल्लाहकारसहितको संयुक्त बैठकले इपान र यससँग सम्बद्ध जलविद्युत् कम्पनीहरूको तर्फबाट प्रधानमन्त्री दैवी प्रकोप उद्धार कोषमा उक्त रकम सहयोग गर्ने निर्णय गरेको हो ।
बैठकले बुधबार (भदौ १० गते) भोटेकोसी नदीमा आएको विनाशकारी बाढीका कारण रसुवा, नुवाकोट, धादिङ, गोरखा, चितवन, तनहुँलगायत जिल्लामा पुगेकाे जनधनकाे क्षति दु:ख व्यक्त गर्दै घाइतेहरूको शीघ्र स्वास्थय लाभकाे कामनासमेत गरेको छ ।
‘ऊर्जा क्षेत्र नेपालको समृद्धिसँग मात्र होइन, नेपाली जनताको सुख–दुःखसँग पनि जोडिएको क्षेत्र हो,’ बैठकपछि अध्यक्ष डाँगीले भने, ‘विपद्को समयमा सम्पूर्ण सदस्य कम्पनीहरू एकजुट हुँदा त्यसले पीडित परिवारको जीवनमा ठूलो राहत र आशाको सञ्चार गर्न सक्छ।’
उनले अनुसार आर्थिक सहयोग रकमको चेक उपयुक्त समयमा ऊर्जा, जलस्रोत तथा सिँचाइ मन्त्री विराजभक्त श्रेष्ठको उपस्थितिमा हस्तान्तरण गरिने बताए ।
उद्धार तथा राहतको यस मानवीय अभियानमा इपानका सम्पूर्ण सदस्य कम्पनीहरूलाई सक्रिय र उदारतापूर्वक सहयोग गर्नसमेत उनले आग्रह गरेका छन् । साथै, विपत्बाट प्रभावित नागरिक तथा ऊर्जा क्षेत्रको पुनःस्थापनामा निजी क्षेत्रको सहयोग र ऐक्यबद्धता महत्त्वपूर्ण हुने विश्वास व्यक्त गरेको छ ।
