भिजन लुम्बिनीले भदाै १९ गतेदेखि १९ लाख १२ हजार कित्ता सेयर जारी गर्दै

काठमाडौं । भिजन लुम्बिनी ऊर्जा कम्पनी लिमिटेडले भदौ १९ गतेदेखि पहिलो चरणको सेयर निष्कासन गर्ने भएको छ । कम्पनीले प्रभावित स्थानीय र वैदेशिक रोजगारीमा गएका नेपाली नागरिकका लागि छुट्याएको सेयर निष्कासन गर्न लागेको हो । 

जारी पुँजी १ अर्ब ९१ करोड २५ लाखमध्येको १० प्रतिशत अर्थात १९ करोड १२ लाख ५० हजार रकम बराबरको सय रुपैयाँ अंकित १९ लाख १२ हजार ५ सय कित्ता सेयर प्रभावित क्षेत्र अर्थात कास्की जिल्लाको माछापुच्छ्रे गाउँपालिका वडा नम्बर १, २, ३, ४ र पोखरा महानगरपालिकाको वडा नम्बर १९ का स्थानीय बासिन्दाहरुका लागि निष्कासन गर्न लागेको कम्पनीले जनाएको छ । कम्पनीका अनुसार वैदेशिक रोजगारीमा गएका नेपाली नागरिकका लागि १९ लाख १२ हजार ५ सय कित्ताको १० प्रतिशत अर्थात १ लाख ९१ हजार २ सय ५० कित्ता सेयर निष्कासन गरिनेछ ।

प्रभावित स्थानीयले न्यूनतम १० कित्तादेखि अधिकतम ३ लाख ८० हजार कित्तासम्म र वैदेशिक रोजगारीमा गएका नेपाली नागरिककले न्यूनतम १० कित्तादेखि अधिकतम १९ हजार १ सय २० कित्ता सम्म आवेदन दिन पाउने कम्पनीले जनाएको छ । स्थानीयले छिटोमा असोज २ गतेसम्म र ढिलोमा १७ गतेसम्म आवेदन दिन पाउनेछन् भने वैदेशिक रोजागरीमा गएका नेपाली नागरिककले असोज २ गतेसम्म मात्रा आवेदन दिन पाउनेछन् । 

कम्पनीको सेयर निष्कासन गरी बाँडफाँड गर्न मुक्तिनाथ क्यापिटल लिमिटेडलाई बिक्री प्रबन्धक तोकिएको छ । कम्पनीले कास्की जिल्लामा २५ मेगावाटको सेती नदी जलविद्युत आयोजना निर्माण गरिरहेको छ । यस आयोजनाको काम अन्तिम चरणमा पुगेको छ । विद्युत प्राधिकरणले यो आयोजनाको विद्युत हिउँदमा प्रतियुनिट ८.४० रुपैयाँ र बर्खामा ४.८० रुपैयाँमा किन्ने गरी विद्युत खरिद सम्झौता (पिपिए) गरेको छ ।