ऊर्जा खबर
काठमाडौं । माया खोला हाइड्रो पावर कम्पनीले २४ लाख कित्ता साधारण सेयर निष्कासन गर्ने भएको छ । कम्पनीले संखुवासभामा निर्माणाधीन १४.९ मेगावाटको माया खोला जलविद्युत आयोजनाको स्थानीयबासी र सर्वसाधारणका लागि साधारण सेयर निष्कासन गर्न लागेको हो ।
कम्पनीले प्रतिकित्ता सय रुपैयाँ अंकित २४ करोड रुपैयाँको साधारण सेयर निष्कासन गरी बाँडफाँड गर्न प्रभु क्यापिटललाई बिक्री प्रबन्धकमा नियुक्त गरेको छ । नियुक्ती सम्बन्धी सम्झौतामा कम्पनी र क्यापिटलबीच बिहीबार हस्ताक्षर भएको हो ।
सम्झौतामा कम्पनीका अध्यक्ष विजयमान शेरचन र क्यापिटलकातर्फबाट प्रबन्ध संचालक दिनेश थकालीेले हस्ताक्षर गरे । बिक्री प्रबन्धक नियुक्त गरिएकाले केही दिनमै सेयर निष्कासनको अनुमति लिन नेपाल धितोपत्र बोर्डमा आवेदन दिइने कम्पनीले जनाएको छ ।
कम्पनीले निर्माण गरिरहेको आयोजनाको ६० प्रतिशत निर्माण पूरा भएको छ । आयोजनाबाट २०७८ असारदेखि विद्युत उत्पादन गर्ने तालिका छ । तर, कोराना महामारीका कारण आयोजनाको निर्माण प्रभावित हुन पुगेकाले उत्पादन अवधि सर्ने देखिन्छ ।
आयोजनाको बाँध, सुरुङ र विद्युतगृहको निर्माण एकसाथ भइरहेको छ । सबैभन्दा धेरै काम मुख्य सुरुङमा भएको छ । यो आयोजना सम्पन्न गर्न २ अर्ब ५० करोड रुपैयाँ लागत अनुमान गरिएको छ ।
आयोजना सम्पन्न भई उत्पादन हुने विद्युत २२० केभी कोसी कोरिडोर प्रसारण लाइनको बानेश्वर सबस्टेसनमा लगेर जोडिनेछ । सबस्टेसनसम्म आवश्यक ३ किलोमिटर प्रसारण लाइन आयोजनाले निर्माण गर्नेछ ।
माया खोला ‘सुपर सिक्स’ अन्तर्गत प्रतिस्पर्धा गराएर निजी क्षेत्रलाई निर्माण गर्न दिइएको आयोजना हो । यो आयोजना यसअघि नै केन्द्रीय प्रणालीमा जडान भइसक्नु पर्ने भए पनि कोसी कोरिडोर प्रसारण लाइन निर्माणमा भएको ढिलाईका कारण ढिलो गरी सुरु भएकाले अहिलेसम्म सम्पन्न हुन नसकेको हो । विद्युत खेर जाने अवस्था नआओस भनेर ढिलो गरी सुरु गरिएको थियो ।
.jpg)
.jpg)