ऊर्जा खबर
तनहुँ । पृथ्वी राजमार्गअन्तर्गत मुग्लिन–पोखरा सडक पूर्वी खण्डको ७ किलोमिटर सडक संरचना परिवर्तन गरिने भएको छ । राजमार्गमा पर्ने ६९ मेगावाटकाे मर्स्याङ्दी जलविद्युत् केन्द्रको संरक्षण गर्न संरचना परिवर्तन गरिने भएको हो ।
उक्त जलविद्युत केन्द्रभन्दा माथि ७ किलोमिटर सडक घुमाएर मुग्लिन लगिने आयोजना निर्देशनालय (एडीबी) का आयोजना निर्देशक चुँडाराज ढकालले जानकारी दिए । आँबुखैरेनी गाउँपालिका–२ भुवनटारबाट मर्स्याङ्दी नदीमा पुल निर्माण गरी पूर्वतर्फ गोरखाको पहाड काटेर राजमार्ग निर्माण गरिने उनले जानकारी दिए । ‘पुल पार गरेर पुनः सडक मुग्लिन बजारमा जोडिनेछ’, ढकालले भने ।
जलविद्युत् केन्द्रकाे विद्युत्गृह हुँदै हाल सञ्चालनमा रहेको राजमार्ग फराकिलो पार्न नमिल्ने भएकाले उक्त क्षेत्रमा सडकको संरचना र स्थान परिवर्तन गर्नुपरेको आयोजनाले जनाएको छ ।
