बिपिसीले वालिङ क्षेत्रमा बिनासूचना विद्युत् काट्यो, सर्वसाधारणलाई सास्ती

स्याङ्जा (वालिङ) । बुटवल पावर कम्पनी (बिपिसी) लिमिटेडले वालिङ क्षेत्रमा बिनासूचना अनियमितरूपमा विद्युत् कटौती गर्न थालेको छ । आज (मंगलबार) पनि विद्युत् कटौती गरेपछि त्यस क्षेत्रमा समस्या देखिएको छ ।

वालिङ बजार क्षेत्र र केही ग्रामीण क्षेत्रमा बिहानैदेखि बिजुली काटिएको स्थानीयले गुनासो गरेका छन् । त्यस क्षेत्रमा बिपिसीले ९.४ मेगावाटको आँधीखोला विद्युत्गृहबाट उत्पादित विद्युत् वितरण गरिरहेको छ । मिर्दीमा रहेको कन्ट्रोल प्यानलमा फेर्नुपर्ने हुँदा त्यसैका लागि आपूर्ति बन्द गरिएको आँधीखोलाका केन्द्र प्रमुख डोलप्रसाद खरेलले बताए ।

‘बिनासूचना विद्युत् काटिएको भन्ने होइन, बिहान सूचना निकालेका थियौं,’ उनले मंगलबार ऊर्जा खबरसँग भने, ‘दुई घन्टामा काम सकिन्छ भन्ने थियो तर तोकिएको समयमा पूरा हुन सकेन । हामी असफल भयौं ।’ अब करिब दुई घन्टामा आपूर्ति सुचारु हुने उनले जानकारी दिए ।

बिहानैदेखि विद्युत् आपूर्ति बन्द हुँदा सहर तथा ग्रामीण क्षेत्रबाट सेवा लिन बजार झरेकाहरूले दुःख पाएको नेपाल पत्रकार महासंघ स्याङ्जाका अध्यक्ष श्रीकृष्ण सिग्देलले बताए । ‘सेवा प्रदायक संस्थाले सूचना नदिई सेवा अवरुद्ध गर्न पाइँदैन,’ उनले भने, ‘गाउँबाट रेमिट्यान्स लिन बजार झरेका, मालपोतमा काम हुने तथा राहाधानी बनाउन आउने सबैले सास्ती खेपेका छन् ।’

अहिले सबैजसो सरकारी काम अनलाइनबाट हुने गरेको छ । अनलाइन सेवाका लागि विद्युत् पहिलो आवश्यकता हो तर बिपिसीले यसमा लापरबाही गरेको सिग्देलले बताए । मालपोत, राहाधानी फाँट, रेमिट्यान्स लगायत सेवा केन्द्रको काम ठप्प भएको उनको भनाइ छ । बिपिसी अब मर्मत संभारकै काम गर्दा बिदा दिन पानुपर्ने उनले बताए ।