ऊर्जा खबर
.jpg)
काठमाडौं । रिभर फल्स पावर लिमिटेडले ३४ लाख ३० हजार कित्ता सेयर साधारण निष्कासन गर्न नेपाल धितोपत्र बोर्डबाट अनुमति पाएको छ । कम्पनीले आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न अनुमति पाएको हो ।
सय रुपैयाँमा अंकित ३४ करोड ४० लाख रुपैयाँ बराबरको साधारण सेयर निष्कासन गर्न अनुमति पाएको कम्पनीले जनाएको छ । कम्पनीका अनुसार अब छिट्टै सेयर निष्कासन गरी बाँडफाँड गरिनेछ ।
पहिलो चरणमा आयोजना प्रभावित स्थानीय र दोस्रो चरणमा सर्वसाधारणका लागि सेयर निष्कासन गर्ने कम्पनीले जनाएको छ । सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक तोकिएको छ ।
कम्पनीले संखुवासभामा १०.३ मेगावाटको डाउन पिलुवा जलविद्युत आयोजना निर्माण गरीरहेको छ । २०७० फागुनदेखि नै उत्पादन अनुमति लिई अघि बढेको आयोजनाबाट २०७९ साउनदेखि विद्युत उत्पादन गर्ने लक्ष्य छ ।
आयोजना सम्पन्न गर्न १ अर्ब ८९ करोड ४० लाख रुपैयाँ लागत अनुमान गरिएको छ । आयोजनामा सिटीजन्स बैंकको अगुवाईमा नेपाल इन्भेसमेन्ट बैंक र प्रभु बैंकले ७० प्रतिशत अर्थात १ अर्ब ३२ करोड रुपैयाँ ऋण लगानी गरेका छन् । बाँकी ३० प्रतिशत स्वपुँजी लगानी छ ।
