ऊर्जा खबर
काठमाडौं । नेपाल विद्युत प्राधिकरण तुलसीपुर वितरण केन्द्रले तुलसीपुरका इन्टरनेट सेवा प्रदायक कम्पनीलाई पाेलमा लत्रिएको अव्यवस्थित तार हटाउन निर्देशन दिएको छ । केन्द्रले पहिले नै सूचना दिएर विद्युतीय पोलमा जथाभावी लत्रिएका केबल हटाउन भने पनि सेवा प्रदायकले नटेरेपछि फेरि ध्यानाकर्षण गराएको हो ।
केन्द्रले नेपाल टेलिकमसहित १२ सेवा प्रदायक कम्पनीको कार्यालयमा पुगेर ध्यानाकर्षण गराएको हो । तार नहटाउँदा बजार कुरुप बनेको जनाउँदै त्यसलाई हटाउनका लागि १५ दिने सूचना पनि जारी गरेको केन्द्रले जनाएको छ ।
तार व्यवस्थित गर्न केन्द्रले चिठी पठाएको भए पनि सोहीअनुरुप काम नभएको पाइएको जनाइएको छ । तुलसीपुर क्षेत्रमा नेपाल टेलिकम, एनसिएललगायत १२ वटा इन्टरनेट सेवा प्रदायक कम्पनीसँग समन्वय गरेर काम लाग्नेलाई एक ठाउँमा बाँध्ने र लामो समयदेखि काम नलाग्ने अवस्थामा रहेका तारलाई निकाल्ने भनी सहमति भएको थियो ।
यसअघि नेट बिग्रिने, पोल ढल्ने हुँदा मात्रै तार हेर्ने चलन थियो । त्यस्तै घरमा नेट बन्द गरे पनि त्यो तार त्यही पोलमा छोड्ने कार्य भइरहेको छ ।
