ऊर्जा खबर
काठमाडौं । नेपाल विद्युत प्राधिकरणले विद्युतीय गाडी किन्ने कर्मचारीलाई ३ लाख रुपैयाँसम्म ऋण दिने भएको छ । प्राधिकरणले आफ्ना करिब १० हजार कर्मचारीलाई विद्युतीय सवारी किन्न ऋण दिने भएको हो ।
शुक्रबार भारतीय ब्राण्ड ओडिसी अटोमोटिभको नेपालमा शोरुम उद्घाटन गर्दै प्राधिकरणका सहनिर्देशक कोमलनाथ आत्रेयले यस्तो बताएका हुन । उनका अनुसार विद्युतीय गाडीलाई प्रवर्द्धन गर्न कर्मचारीलाई ३ लाख रुपैयाँसम्म ऋण दिइनेछ ।
‘हामी प्राधिकरणलाई चाहिने नयाँ विद्युतीय गाडी मगाउने गरेका छौ’ उनले भने, ‘त्यस्तै कर्मचारीले नयाँ गाडी किन्ने भए ३ लाख रुपैयाँसम्म कर्जा दिनेछौ ।’ आगामी दिनमा सबै सवारी साधन विद्युतीय मात्र चलाउने लक्ष्य अनुरुप २० वटा गाडी र ५० वटा मोटरसाइकल किन्न लागिएको आत्रेयले बताए ।
सन् २०३० सम्म पेट्रोलियम पदार्थबाट चल्ने गाडी विस्थापित गर्ने योजनाअनुसार विद्युतको महसुल घटाउँदै लगेको पनि उनले बताए । उनका अनुसार रातीको समयमा चार्ज गरे ३ रुपैयाँ मात्रै लाग्ने गरि छुट्टै मिटरको व्यवस्था गर्न लागिएको छ ।
