ऊर्जा खबर
काभ्रेपलाञ्चोक । गत असोज दोस्रो साताको बाढीपहिराले क्षतिग्रस्त काभ्रेपलाञ्चोकको पनौती नगरमा ११ किलोमिटर लामो मल्पी–लिलावती सिँचाइ आयोजनाको कुलोे पुनर्निर्माण गरिएका छन् । यसका लागि करिब ३ हजार स्थानीयले श्रमदान गरेका थिए ।
कात्तिक दोस्रो सातादेखि पुनर्निर्माण थालिएको उक्त आयोजनाको कुलोमा आइतबार पानी परीक्षण समेत गरिएको छ । करिब तीन महिना गरिएको श्रमदानमा पनौती नगरको ४, ७ र ८ नम्बर वडाका कृषक, महिला कृषि सहकारी, विभिन्न युवा क्लब, महिला समूह, आमा समूह, विद्यार्थी, शिक्षकलगायत सहभागी थिए ।
सरसफाइसहित पुनर्निर्माणको काम सकिएको पनौत–४ का वडाध्यक्ष दीपकप्रसाद दाहालले बताए । ‘अब पनौतीको फाँटमा सिँचाइ गर्न सकिने भएको छ’, उनले भने ।
सिँचाइ कुलो पुनर्निर्माण गर्न बागमती प्रदेश सरकारबाट ५० लाख रूपैयाँ प्राप्त भएको उनले बताए । कुलो सफाइका लागि भने श्रमदान अभियानै सञ्चालन गरिएको थियो । आयोजनाको क्षतिग्रस्त २० प्रतिशत संरचना नयाँ निर्माण र ८० प्रतिशत क्षेत्रमा कुलोमा थुप्रिएको माटो निकालिएको वडाध्यक्ष दाहालले बताए ।
बाढीपहिरोले सिँचाइ आयोजनाको अधिकांश भागमा क्षति पुगेको थियो । जनश्रमदान अभियानबाट कुलो पुनर्निर्माण थालिएको करिब ३ हप्तापछि मल्पीस्थित १ नम्बर गेटसम्म कुलो मर्मत गरी सञ्चालनमा ल्याइएको थियो ।
उक्त आयोजनाको पुनर्निर्माण सकिएपछि हाल पनौतीको करिब १० हजार रोपनी जमिनमा सिँचाइ सुविधा पुगेको छ ।
