माई खोला हाइड्रोले पहिलो चरणको सेयर फागुन २५ गतेदेखि निष्कासन गर्ने

काठमाडौं । माई खोला हाइड्रो पावर लिमिटेडले पहिलो चरणको सेयर निष्कासन गर्ने भएको छ । कम्पनीले प्रभावित स्थानीय र वैदेशिक रोजगारीमा गएका नेपाली नगारिकका लागि छुट्याएको सेयर निष्कासन गर्न लागेको हो । 

जारी पूँजी ३९ करोड २२ लाख ५६ हजार ८ सय मध्येको १० प्रतिशत हुन आउने अर्थात ३ करोड ९२ लाख १५ हजार ७ सय रकम बराबरको सय रुपैयाँ अंकित ३ लाख ९२ हजार १५७ कित्ता सेयर आयोजना प्रभावित इलाम जिल्लाका स्थानीय बासिन्दाहरूका लागि निष्कासन गर्न लागेको कम्पनीले जनाएको छ । कम्पनीका अनुसार सर्वसाधारणमा निष्कासन हुने सेयरको १० प्रतिशत अर्थात १ करोड ५२ लाख ९४ हजार १ सय रुपैयाँ रकम बराबरको सय रुपैयाँ अंकित १ लाख ५२ हजार १४१ कित्ता सेयर वैदेशिक रोजगारीमा गएका नेपाली नागरिकका लागि निष्कासन गर्न लागेको हो । 

प्रभावित स्थानीयले न्यूनतम १० कित्तादेखि अधिकतम १० हजार कित्ता सम्म आवेदन दिन पाउनेछन भने वैदेशिक रोजगारीमा गएका नेपाली नागरिकले न्यूनतम १० कित्तादेखि अधिकतम  ५० हजार कित्ता सम्म आवेदन दिन पाउनेछन् । 

स्थानीयले छिटोमा चैत ९ गतेसम्म र ढिलोमा २४ गतेसम्म आवेदन दिन सक्नेछन । यसैगरी, वैदेशिक रोजगारीमा गएका नेपाली नागरिकले चैत ९ गतेसम्म मात्र आवेदन दिन सक्नेछन् । 

कम्पनीको सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक तोकिएको छ । कम्पनीको इलाममा ३ मेगावाटको सुपरमाई क्यासकेड जलविद्युत आयोजना सञ्चालनमा छ ।