२० किलोमिटर बुटवल–लुम्बिनी लाइन सञ्चालनको तयारी

काठमाडौं । आन्तरिक प्रसारण प्रणाली सुधार र औद्योगिक क्षेत्रमा गुणस्तरीय विद्युत सेवा दिनका लागि निर्माण गरिएको १३२ केभी बुटवल–लुम्बिनी प्रसारण लाइन आयोजनाको काम अन्तिम चरणमा पुगेको छ । नेपाल विद्युत प्राधिकरणकाे निर्माण सुरु भएको करिब ३ वर्षमा लाइनको काम सकिन लागेको हो ।

लाइनको १८ किलोमिटर लाइनमा टावर ठड्याउने, तार तान्ने सबै काम सकिएको आयोजना प्रमुख हरि पाण्डेले बताए । ‘अहिले आयोजनाको २ किलोमिटर लामो भुमिगत लाइनको अन्तिम चरणको काम भइरहेको छ’, उनले ऊर्जा खबरसँग भने, ‘भूमिगत लाइनको बाँकी काम सकाएर आगामी एक साताभित्र सञ्चालन गर्ने तयारी भइरहेको छ ।’ मौसमले साथ दियो भने एक साताभित्र लाइन चार्ज हुन्छ’ उनले थपे ।

प्रसारण लाइनको काम गत असारमानै सम्पन्न गरी सञ्चालनमा ल्याइसक्नु पर्ने तालिका थियो, तर कोरोना महामारीका कारण भएको निषेधाज्ञाले काम प्रभावित भएको पाण्डेले बताए । दोस्रो लहरका बेला लगाइएको निशेधाज्ञा अवधिमा उपकरण आयात हुन नसक्दा काम सम्पन्न हुन सकेन् र सञ्चालन तालिका धकेलिन पुगेको हो ।

प्रसारण लाइन अन्तर्गत निर्माण भइरहेको मैनहिया सबस्टेनको काम पनि अन्तिम चरणमा पुगेको छ । सबस्टेसनमा जडान हुने पावर ट्रान्सफर्मर भारतको सिजिएल कम्पनीबाट ल्याइएको हो । यसअघि आइएमटी कम्पनीबाट ल्याउने सम्झौता भएपनि कम्पनीले ढिला गरेकोले ठेक्का तोडेर सिजिएललाई दिइएको हो ।

प्रसारण लाइन निर्माणको जिम्मा चीनको टिबीए साङदोङ लुनेङ र नेपालको जोशी एण्ड मुडबरी कम्पनीले सयुक्त रुपमा गरिरहेका छन् । सबस्टेसनको काम हाइटेनशन स्वीचगेयर कम्पनीले गरिरहेको छ ।

प्रसारण लाइन निर्माण सम्पन्न गर्न १ अर्ब २० करोड रुपैयाँ लागत अनुमान गरिएको छ । प्रसारण लाइन तयार भएपछि बुटवल लुम्बिनी क्षेत्रमा गुणस्तरीय विद्युत सेवा दिन सकिने प्राधिकरणले जनाएको छ ।

प्रदेश–५ को रुपन्देही तथा नवलपरासी (बर्दघाट सुस्ता पश्चिम) र गण्डकी प्रदेशको नवलपरासी (बर्दघाट सुस्ता पूर्व) का उद्योगमा विद्युत सेवा गुणस्तरीय र दिगो बनाउने गरी वा भैरहवा–लुम्बिनी औद्योगिक करिडोरलगायत विद्युत विस्तार र स्तरोन्नतिका लागि लाइन विस्तार थालिएको थियो ।

यो लाइन निर्माण हुँदा रुपेन्देहीको भैरहवा क्षेत्रका उद्योग र सर्वसाधारणले नियमित गुणस्तरीय विद्युत सेवा पाउने प्राधिकरणको दाबी छ । लाइन सञ्चालनमा आएपछि चुहावट घट्नुका साथै प्रसारण क्षेत्रमा सृदृढ हुनेछ । यो लाइन पूरा भएपछि यसबाट २ सय मेगावाट विद्युत प्रवाह गर्न सकिने प्राधिकरणले जनाएको छ ।