ऊर्जा खबर
काटमाडौं । नेपाल विद्युत प्राधिकरण भरतपुर वितरण केन्द्रले केबल नेटवर्क तथा इन्टरनेट सेवा प्रदायकबाट करिब साढे १ करोड रुपैयाँ राजस्व संकलन गरेको छ । केन्द्रले प्राधिकरणको संरचना उपयोग गर्ने सेवा प्रदायकबाट यति राजस्व उठाएको हो ।
हालसम्म विद्युतीय संरचना प्रयोग गरेवापत सेवा प्रदायकबाट १ करोड ४७ लाख ३९ हजार ९ सय ७३ रुपैयाँ राजस्व उठाएको केन्द्रले जनाएको छ । केन्द्रका अनुसार सोमबार (हिजो) मात्रै भायोनेटबाट १२ लाख रुपैयाँ राजस्व असुल गरिएको छ । बाँकी ३० लाख रुपैयाँ पनि छिटै भुक्तानी हुने केन्द्रले जनाएको छ ।
केन्द्रले संरचना प्रयोग गर्ने कनेक्ट नेपाल, त्रिवेणी केबल नेटवर्क, प्राइम नेटवर्क, ब्रोडलिङ्क, डिसहोमलगायतका इन्टरनेट सेवा प्रदायकबाट सो राजस्व असुल गरेको हो ।
प्राधिकरणले २०७३ सालमा नयाँ कार्यविधि बनाएर लागु गरेदेखि नै सेवा प्रदायकले राजस्व तिर्न अटेरी गरेमा कारबाही गरेर असुल्ने अभियान चलाइएको छ । यस्तै, क्लासिक टेक, सिम टिभीलगायतका सेवा प्रदायकबाट राजस्व असुल गर्न बाँकी छ । बारम्बार ताकेता गर्दा पनि राजस्व नबुझाएमा कानुनी प्रक्रियामा जाने निर्णय गरेको केन्द्रले जनाएको छ ।
