ऊर्जा खबर
काठमाडौं । जगदुल्ला हाइड्रो पावर कम्पनी लिमिटेडमा प्रमुख कार्यकारी अधिकृतका लागि आवेदन खुलेको छ । डोल्पाको जगदुल्ला खोलामा १०४ मेगावाटको जगदुल्ला जलविद्युत आयोजना निर्माणकाे तयारी गरिरहेको कम्पनीले रिक्त पदपूर्ति गर्न आवेदन माग गरेको हो ।
खुल्ला प्रतिस्पर्धाबाट रिक्त पदपूर्ति गर्न आवेदन माग गरेको कम्पनीले जनाएको छ । यसका लागि मान्यता प्राप्त विश्वविद्यालयबाट इन्जिनियरिङ विषयमा स्नातक गरेको र इन्जिनियरिङ बिषयमा स्नातकपछि जलविद्युत क्षेत्रमा कम्तीमा ४ वर्षको कार्य अनुभव हुनुपर्नेछ । साथै, पूर्वाधार क्षेत्र कम्तीमा १२ वर्षको अनुभव हुनुपर्नेछ ।
आवेदन दिनका लागि ३५ बर्ष पूरा गरी ६१ वर्ष ननाघेको हुनुपर्ने गरि उमेर हद तोकिएको छ । इच्छुक नेपाली नागरिकले १५ दिन (फागुन २८ गते) भित्र कार्यालय समयमा दरखास्त दिन सक्नेछन् ।
१०६ मेगावाटको जगदुल्ला जलविद्युत आयोजना निर्माणका लागि पूर्वतयारीको काम चलिरहेको छ । यो वर्ष तयारी सकेर आगामी वर्षबाट निर्माणका जाने योजना रहेको छ । २३ अर्ब रुपैयाँ लाग्ने अनुमान गरिएको आयोजनाको सम्भाव्यता अध्ययन भइसकेको छ । वातावरणीय प्रभाव मूल्यांकन (इआइए) अन्तिम चरणमा पुगेको छ ।
आयोजनाले विद्युत विकास विभागबाट २०७४ मा अध्ययनका लागि सर्वे लाइसेन्स लिएर अध्ययन अघि बढाएको हो । डोल्पामा निर्माण हुने आयोजनाको विद्युतगृह मुड्केचुला गाउँपालिका–४, इलमा निर्माण हुने तथा जगदुल्ला गाउँपालिका वडा नम्बर १ र २ मा बाँध निर्माण हुने अध्ययनले देखाएको छ ।
काम सुरु गरेको करिब ६ वर्षभित्र पूरा गर्ने लक्ष्य लिइएको आयोजनाको करिब ७.१ किलोमिटर भूमिगत सुरुङ निर्माण गरी इलस्थित विद्युतगृहमा खसालिने अध्ययनले देखाएको छ ।
कूल ३०७ मेगावाट विद्युत उत्पादन गर्ने लक्ष्यका साथ काम थालिएको भए पनि भौगोलिक विकटताका कारण १०६ मेगावाटमात्र विद्युत उत्पादन गर्न सकिने गरी क्षमता अद्यावधिक (अप्टिमाइजेसन) गरिएको छ । आयोजना सम्पन्न भएपछि वार्षिक ६१५.३२ गिगावाट घन्टा विद्युत उत्पादन हुनेछ ।
