ऊर्जा खबर
काठमाडौं । सरकार र सिंगापुरको एक कम्पनीबीच २५० मेगावाटको सौर्य ऊर्जा परियोजना विकास गर्नका लागि विस्तृत अध्ययन गर्नेबारे समझदारी भएको छ । प्रधानमन्त्री अध्यक्ष रहेको लगानी बोर्डले आज (मंगलबार माघ १३ गते) राइजेन इनर्जी सिंगापुर जेभीसँग उक्त समझदारी गरेको हो ।
परिरयोजनाको विस्तृत सम्भाव्यता अध्ययन प्रतिवेदन (डिएफएसआर) तयार गर्ने विषयमा बोर्ड र कम्पनीबीच भएको समझदारीमा बोर्डका प्रमुख कार्यकारी अधिकृत सुशील भट्ट र कम्पनीका दक्षिण एसिया हेर्ने विकास प्रबन्धक वाङ क्विङले हस्ताक्षर गरेका छन् ।
बोर्डका अनुसार कपिलवस्तुको बाणगंगामा १२५ मेगावाट र बाँकेको कोहलपुरमा १२५ मेगावाट सौर्य विद्युत् आयोजना निर्माण हुनेछन् । त्यसमा २०–२० मेगावाटका स्टोरेज (भण्डारण) आयोजना समेत निर्माण गरिनेछ । कम्पनीले १२ महिनाभित्र विस्तृत अध्ययन प्रतिवेदन तयार गरी बोर्डमा बुझाउनुपर्ने उल्लेख छ ।
२०७७ असार ५ गते बसेको बोर्डको ४४औं सञ्चालक समितिको बैठकले कम्पनीलाई डिएफएसआर तयार गर्न अनुमति दिएको थियो । योसँगै अध्ययन अनुमतिपत्र दिने निर्णय पनि गरिएको थियो ।
