ऊर्जा खबर
दोलखा । दोलखा जिल्लाको बिगू गाउँपालिका वडा नम्बर १ लामाबगरस्थित भीरबाट खसेर बेपत्ता भएका एक पुरुष एक हप्ता बितिसक्दा समेत फेला परेका छैनन् ।
लामाबगरमा सडक निर्माणमा कार्यरत कैलाली जिल्लाको घोडाघोडी नगरपालिका–५ का ४९ वर्षीय दिलबहादुर घर्ती गत पुस ४ गते बिहान भिरबाट लडेर बेपत्ता भएको जिल्ला प्रहरी कार्यालय दोलखाले जनाएको छ ।
घर्ती नासा हाइड्रो पावरले निर्माण गरिरहेको १६० मेगावाटको लप्ची खोलाका लागि आवश्यक लामाबगर–लुम्नाङ सडक खण्डमा कार्यरत थिए । एमभी दुगड समूहले प्रवद्र्धित लप्ची खोलाको प्रवेश मार्गको एमभी दुगड अन्तर्गतकै सुमो कन्स्ट्रक्सनले काम गरिरहेको छ ।
जिल्ला प्रहरी कार्यालय दोलखाका प्रमुख डिएसपी गंगा पौडेलले घर्तीको खोजी कार्य जारी रहेको तर हालसम्म फेला पार्न नसकिएको जानाकरी दिए । ‘ठूलो भीर र भीरमुनी साँघुरो तामाकोसी नदीको खोंच भएकाले पनि खोजी कार्य जटिल भएको छ,’ उनले भने, ‘उनी १२ दिनअघि मात्र सडकमा काम गर्नका लागि १५ जनाको समूहमा आएका थिए ।’
यसअघि पनि नासा हाइड्रोपावरको सुमो कन्ट्रक्सनमा कार्यरत ३ जनाको भीरबाटै लडी नदीमा डुबेर ज्यान गइसकेको छ । आयोजनाले मजदुरको सुरक्षामा प्रयाप्त ध्यान दिन नसक्दा ज्यान गएको मजदुरहरु बताउँछन् ।
