ऊर्जा खबर
काठमाडौँ । लमजुङमा १.६ मेगावाटको लोदोखोला साना जलविद्युत् आयोजना निर्माण हुने भएको छ । लमजुङको दोर्दी गाउँपालिकामा अवस्थित लोदो खोलाको पानी उपयोग गर्दै लिवर्टी इनर्जी कम्पनीले आयोजना विकास गर्न लागेको हो । यसका लागि कम्पनीले विद्युत् उत्पादन अनुमति पत्रको माग गर्दै विद्युत् विकास विभागमा आवेदन दिएको छ ।
समुद्री सतहबाट १ हजार ५७४ मिटर उचाइमा रहने आयोजनाको विद्युत्गृह र बाँध संरचना दोर्दी गाउँपालिकामा रहने छन् । बाँधसँगै लोदो खोलाको बाँया किनारमा १.१ मिटर अग्लो ०९ मिटर उचाइएको साइड इन्टेकबाट आउने पानीलाई १७.७८ मिटर लामो एप्रोच क्यानल हुँदै २.९ मिटर चौडाइ, २.४२ मिटर उचाइ र २८ मिटर लम्बाइभएको सेटलिङ बेसिनमा लगिने छ । त्यहाँबाट ६०० मिटर लामो पोरवे हुँदै १ हजार ४३६ मिटरको पेनस्टक पाइइपमार्फत विद्युत् गृहमा लगेर विद्युत् उत्पादन गरिने कम्पनीले जनाएको छ ।
विद्युत् गृहबाट निस्केको पानीलाई २५ मिटर लामो टेलरेसमार्फत साेही कम्पनीले निर्माण गरेकाे माथिल्लो दोर्दी ए जलविूद्यत् आयोजनाको 'हेडपोन्ड'मा खसालिने आयोजनाको लक्ष्य छ ।
आयोजनाबाट उतपादन हुने बिजुली ६ किलोमिटर लामो प्रसारण लाइनमार्फत कीर्तिपुर हबबाट राष्ट्रिय प्रसारण लाइनमा प्रवाह गरिने छ । २०८३ साल चैत सम्म निर्माण सम्पन्न गर्ने लक्ष्य राखिएको छ ।
