ऊर्जा खबर
काठमाडौं । ग्रीन भेन्चर्स लिमिटेडको सेयर आवेदन दिने आज अन्तिम दिन हो । कम्पनीले रामेछापमा निर्माण सम्पन्न जलविद्युत आयोजनाको सर्वसाधारणका लागि गत चैत ८ गतेदेखि निष्कासन गरेको सेयर आवेदन अवधि आज साझा ५ बजेबाट सकिने लागेको हो ।
कम्पनीले सर्वसाधारणका लागि सय रुपैयाँमा अंकित ३१ करोड २५ लाख रुपैयाँ बराबरको ३१ लाख २५ हजार कित्ता साधारण सेयर निष्कासन गरेको हो । कम्पनीका अनुसार निष्कासित सेयरमध्ये ९३ हजार ७ सय ५० कित्ता अर्थात ५ प्रतिशत सेयर कर्मचारीहरुका लागि सुरक्षित गरिएको छ ।
यस्तै, १ लाख ५६ हजार २ सय ५० कित्ता अर्थात ५ प्रतिशत सेयर सामुहिक लगानी कोषका लागि सुरक्षित गरिएको छ । बाँकी, २८ लाख ७५ हजार कित्ता सेयरका लागि सर्वसाधारणले आवेदन दिन पाउने कम्पनीले जनाएको छ ।
सर्वसाधारणले न्यूनतम १० कित्तादेखि अधिकतम ५० हजार कित्तासम्मका लागि आवेदन दिन पाउनेछन् । कम्पनीले सेयर निष्कासन गरी बाँडफाँड गर्न लक्ष्मी क्यापिटल मार्केट लिमिटेडलाई बिक्री प्रबन्धक तोकेको छ ।
कम्पनीले यसअघि पनि स्थानीयका लागि सेयर निष्कासन गरी बाँडफाँड गरीसकेको छ । कम्पनीले रामेछापको लिखु नदीमा निर्माण गरेको लिखु–४ आयोजना सम्पन्न भई सञ्चालनमा आइसकेको छ । आयोजनाले अहिले व्यापारिक विद्युत उत्पादन गरिरहेको छ । यो आयोजना ९ अर्ब ५४ करोड रुपैयाँ लागतमा सम्पन्न भएको हो ।
