ऊर्जा खबर
काठमाडौं । नेपाल विद्युत प्राधिकरण धरान वितरण केन्द्रले करिब १ करोड रुपैयाँ विद्युत महशुल बक्यौता असुली गरेको छ । केन्द्रले लामो समयसम्म विद्युत महशुल नबुझाएका ग्राहकको लाइन काटी बक्यौता असुली गरेको हो ।
चालु आर्थिक वर्ष २०७८/७९ को साउनदेखि मंसिरसम्मको अवधिमा विद्युत महशुल नबुझाउने ७ सय ४८ ग्राहकको लाइन काटेको केन्द्रका लेखा प्रमुख विकास खड्काले बताए । उनका अनुसार लाइन काटिएका ग्राहकबाट १ करोड ५ लाख ९९ हजार १ सय ८८ रुपैयाँ महशुल उठाउन बाँकी थियो ।
लाइन काटिएका ग्राहकमध्ये ६ सय ५३ जनाले जरिवानासहितको १ करोड ६३ हजार ५ सय ८७ रुपैयाँ विद्युत महशुल बक्यौता बुझाएपछि लाइन पुनःजोडिएको छ । बाँकी, ९५ जनाले जरिवानासहितको बक्यौता बुझाएपछि लाइन जोडिनेछ ।
केन्द्रले सबैभन्दा बढी कात्तिक र मंसिरमा ग्राहकको लाइन काटेको छ । कात्तिकमा ३ सय १४ र मंसिरमा २ सय ७३ जना महशुल नबुझाउने ग्राहकको लाइन काटिएको केन्द्रले जनाएको छ । केन्द्रले महशुल नबुझाउने ग्राहकको लाइन काटि बक्यौता उठाउने कामलाई तिव्र गतिमा अघि बढाएको छ ।
