ऊर्जा खबर
काठमाडौं । नेपाल विद्युत प्राधिकरणकाे कोहलपुर वितरण केन्द्रले विद्युत महसुल संकलन काउन्टर खुल्ने समय थप गरेको छ । केन्द्रले सेवाग्राहीको थप सुविधाका लागि भन्दै महसुल संकलन गर्ने अवधि दैनिक २ घन्टा थप गरेकाे हाे ।
विद्युत महसुल भुक्तानी गर्न आउने ग्राहकका लागि आइतबारदेखि बिहीबारसम्म बिहान ९ बजेदेखि दिउसो ३ बजेसम्म काउन्टर खुल्ला गरिने केन्द्रले जनाएको छ । केन्द्रका अनुसार शुक्रबार भने बिहान ९ बजेदेखि २ बजेसम्म मात्र महसुल संकलन काउन्टर खुल्ला हुनेछ । यसअघि बिहान १० बजेदेखि दिउसो २ बजेसम्म मात्रै केन्द्रकाे विद्युत महसुल संकलन काउन्टर खुल्ला हुने गरेको थियो ।
सरकारी, गैरसरकारी, औद्योगिक क्षेत्र एवं घरयासी लगायत सबै वर्गका ग्राहकलाई विद्युत महसुल भुक्तानी गर्नका लागि बिहान १ घन्टा र बेलुका १ घन्टा समय थप गरिएको केन्द्रले जनाएको छ । केन्द्रकाे कार्यलयबाट बढी दुरीमा रहेका ग्राहकका लागि उप–वितरण केन्द्र स्थापना गरी सेवा प्रवाह भइरहेको छ । केन्द्र अन्तर्गत ४० हजार बढी ग्राहकले विद्युत सेवा लिइरहेका छन् ।
