बागमती र गण्डकी प्रदेशका ४४०० मेगावाटका आयोजना निर्माणका विभिन्न चरणमा 

काठमाडौं । बागमती र गण्डकी प्रदेशका विभिन्न जिल्लामा पहिचान भएका करिब ४४०० मेगावाट विद्युत आयोजना निर्माणको विभिन्न चरणमा छन् । यी २ प्रदेशका २४ वटा जिल्लामा अध्ययन पूरा भएका आयोजना निर्माणको विभिन्न चरणमा पुगेका हुन् ।

विद्युत विकास विभागका अनुसार अध्ययन पूरा भई उत्पादन अनुमति पाएका ४३९९ मेगावाटका आयोजनाले उत्पादन अनुमति लिई निर्माण अघि बढाएका छन् ।  बागमती प्रदेशको सिन्धुली, रामेछाप, दोलखा, भक्तपुर, धादिङ, काठमाडौं, काभ्रेपञ्चोक, ललितपुर, नुवाकोट, रसुवा, सिन्धुपाल्चोक, चितवन, मकवानपुर र गण्डकी प्रदेशको बागलुङ, गोरखा, कास्की, लमजुङ, मनाङ, मुस्ताङ, म्याग्दी, नवलपरासी, पर्वत, स्याङ्जा र तनहु जिल्लामा पहिचान भएका आयोजनाले उत्पादन अनुमति लिई निर्माणका कार्यलाई अघि बढाएका हुन् ।

उत्पादन अनुमति पाएका आयोजना मध्ये बागमती प्रदेशकको २१५६ मेगावाटका आयोजना उत्पादन अनुमति पाएको विभागले जनाएको छ । विभागका अनुसार १०० मेगावाटदेखि ५०० मेगावट क्षमता सम्मका ८११ मेगावाटका आयोजनाले अध्ययन पूरा भइ उत्पादन अनुमति पाएका छन् । 

यस्तै, २५ मेगावाटदेखि १०० मेगावाटसम्मका १००१ मेगावाट आयोजना, ५ मेगावाटदेखि २५ मेगावाटसम्मका ३२६ र ५ मेगावाट भन्दा कम क्षमताका १८ मेगावाट आयोजना रहेको विभागको तथ्याङ्कामा उल्लेख छ ।

यस्तै, गण्डकी प्रदेशमा २२४३ मेगावाटको आयोजनाले उत्पादन अनुमति पाएका छन् । उत्पादन अनुमति पाएका यी आयोजनाहरुमध्ये १०० मेगावाटदेखि ५०० मेगावाटसम्म ८६४ मेगावाट आयोजना छन् । २५ मेगावाट क्षमतादेखि १०० मेगावाटसम्म ९४९ मेगावाटका आयोजना, ५ मेगावाट क्षमतादेखि २५ मेगावाटसम्म ३९० मेगावाटका आयोजना र ५ भन्दा कम क्षमताका ४० मेगावाट आयोजनाले उत्पादन अनुमति पाएको विभागले जनाएकाे छ ।