ऊर्जा खबर
काठमाडौँ । संखुवासभाको सभापोखरी गाउँपालिका वडा नम्बर ३ र ५ भएर बग्ने सभाखोलाको पानीलाई सदुपयोग गर्दै ९.५५ मेगावाटको सुपर सभाखोला ए जलविद्युत् आयोजना निर्माण हुने भएको छ । यसका लागि प्रवर्द्धक कम्पनी संखुवासभा पावर डेभलपमेन्ट प्रालिले उत्पादन अनुमति पत्रको माग गर्दै आवेदन विद्युत् विकास विभागले जनाएको छ ।
आयोजनाको स्वीकृत सम्भाव्यता अध्ययन र प्रारम्भीक वातावरणीय परीक्षण (आइइइ) अनुसार सुमुद्री सतहबाट १ हजार २१२ मिटर उचाइमा १६ मिटर लामो बाँध निर्माण गरिने छ ।
नदी प्रवाहमा आधारित (आरओआर) आयोजनाअन्तर्गत १ हजार ८२५ मिटर लामो हेडरेस पाइप, १८ मिटर अग्लो सर्ज साफ्ट र १ हजार ११५ मिटर लामो पेनस्टक पाइप हुँदै सभा खोलाको बायाँ किनारमा रहने सतही विद्युत्गृहमा लगिने छ ।
आयोजनाबाट उत्पादन हुने विद्युत्लाई २० किलोमिटर लामो ३३ केभी सिङ्गल सर्किट प्रसारण लाइन निर्माण गरी नेपाल विद्युत् प्राधिकरणको तुम्लिङटार सबस्टेसनमा जोड्ने लक्ष्य छ ।
निर्माण सुरु गरेको २ वर्षभित्र सम्पन्न गर्ने लक्ष्य राखिएको उक्त आयोजना निर्माण गर्दा कुनै उल्लेखनीय वातावरणीय प्रभाव पर्ने देखिए ३५ दिनभित्र राय–सुझाव उपलब्ध गराउन माग गर्दै विभागले मङ्गलबार सूचना जारी गरेको छ ।
