ऊर्जा खबर
काठमाडौं । नेपाल हाइड्रो पावर एसोसिएसन (एनएचए) को २१औं वार्षिक साधारणसभाले इन्जिनियर अरुण रजौरियाको अध्यक्षतामा नयाँ पदाधिकारी चयन गरेको छ । शुक्रबार (असार ८ गते) सम्मपन्न साधारणसभाले २ वर्षका लागि ११ सदस्यीय कार्यसमिति चयन गरेको हो ।
नयाँ पदाधिकारीमा अध्यक्ष रजौरिया सहित उपाध्यक्ष मनोहर श्रेष्ठ, महासचिव निर्मला लामा, सचिव नारायणहरि रिजाल, कोषाध्यक्षमा अमिता पाण्डे रहेका छन् । यस्तै, सदस्यहरूमा प्रतिमा श्रेष्ठ, नसिबमान सिंह प्रधान, सम्झना चुस्यावाग, वसन्त श्रेष्ठ, कृष्णबहादुर कुमाल र वरदान डाँगी चुनियएका छन् ।
रजौरिया हाल हाइड्रो इलेक्ट्रिसिटी इन्भेष्टमेन्ट एन्ड डेभलपमेन्ट कम्पनी लिमिटेड (एचआइडिसिएल) को उपमहानिर्देशकको जिम्मेवारीमा छन् भने उपाध्यक्ष श्रेष्ठ बुटवल पावर कम्पनी अन्तर्गतको हाइड्रो कन्सल्ट इन्जिनियरिङ लिमिटेडको प्रमुख कार्यकारी अधिकृत छन् । उता प्राधान हाल नेपाल विद्युत् प्राधिकरणको निर्देशकको जिम्मेवारीमा छन् ।
एनएचए विशुद्ध नीति निर्माण तहमा काम गर्ने संस्था भएको हुँदा आगामी दिनमा यसको गरिमालाई कायम गर्दै यो क्षेत्रमा सरकार र निजी क्षेत्रको पुलको काम गरिने नवनिर्वाचित अध्यक्ष रजौरियाले बताए । ‘विगतमा केही कमजोर देखिएको संस्थाको आर्थिक अवस्थामा अब विस्तार सुधार हुँदै आएको छ,’ उनले भने, ‘इन्जिनियरिङ क्षेत्रमा क्रियाशील व्यक्तिहरूलाई तालिम प्रदान गर्ने, राष्ट्रिय तथा अन्तर्राष्ट्रिस्तरमा गोष्ठी, सेमिनार र सम्मेलन गरी यो संस्थालाई व्यावसायिक उचाईमा पुर्याउने हाम्रो ध्येय रहेको छ ।’
कार्यक्रममा प्राधिकरणका पूर्व कार्यकारी निर्देशक तथा बुटवल पावर कम्पनीका प्रमुख कार्यकारी अधिकृत उत्तरकुमार श्रेष्ठ, प्राधिकरणकै पूर्वउपकार्यकारी निर्देशक शान्ति लक्ष्मी शाक्य, एनएचएका पूर्वअध्यक्ष डा. मेखबहादुर विश्वकर्मा, निवर्तमान अध्यक्ष विष्णुबहादुर सिंह, ऊर्जाविद् लालकृष्ण केसी, डा. जगतकुमार भुसाल, विजयमान शेरचन लगायत इन्जिनियरिङ क्षेत्रका प्रबुद्ध व्यक्तिहरूको उपस्थिति थियो ।
.jpeg)
