ऊर्जा खबर
काठमाडौँ । चालु आर्थिक वर्षको पहिलो ११ महिनामा नेपालले २ खर्ब ९६ अर्ब रुपैयाँको पेट्रोलियम पदार्थ आयात गरेको छ । यस अवधिमा भएको कुल आयात १८ खर्ब ९४ अर्ब रुपैयाँको यो १५.६५ प्रतिशत हो । भन्सार विभागको तथ्याङ्क अनुसार डिजेल, पेट्रोल, खाना पकाउने ग्यास (एलपिजी) र हवाई इन्धन गरी उक्त रकम बराबरको पेट्रोलियम आयात भएको हो ।
तीमध्ये सबैभन्दा बढी अर्थात २ खर्ब ७२ अर्ब रुपैयाँ डिजेल, पेट्रोल र एलपिजीको आयातमा बाहिरिएको छ । नेपालले डिजेलको आयातमा सबैभन्दा बढी १ खर्ब ५२ अर्ब रुपैयाँ खर्चिएको छ । समीक्षा अवधिमा १२ लाख ६४ हजार किलोलिटरभन्दा बढी डिजेल आयात गरिएको तथ्याङ्क छ ।
त्यस्तै, दोस्रो स्थानमा पेट्रोलको आयात रहेको छ । यस अवधिमा नेपालले ६८ अर्ब १७ करोड रुपैयाँ बराबरको ६ लाख ८५ हजार किलोलिटर पेट्रोल आयात गरेको छ ।
तेस्रो बढी आयात भने एलपिजीको रहेको छ । समीक्षा अवधिमा ५२ अर्ब २१ करोड रुपैयाँ बराबरको ४७ करोड ५९ लाख किलोग्राम खाना पकाउने ग्यास आयात भएको छ ।
गत आर्थिक वर्षको यही अवधि (पहिलो ११ महिना) मा जम्मा २ खर्ब ३० अर्ब ९४ करोड रुपैयाँको पेट्रोलियम आयात भएको थियो । उक्त वर्ष १ खर्ब १५ अर्ब रुपैयाँ बराबरको डिजेल, ५८ अर्ब ५८ करोड रुपैयाँ बराबरको पेट्रोल र ५७ अर्ब ३६ करोड रुपैयाँ बराबरको खाना एलपिजी आयात गरिएको थियो ।
समग्रमा, चालु आवको समीक्षा अवधिमा नेपालको व्यापार घाटा १५ प्रतिशतले बढेर १६ खर्ब १६ अर्ब रुपैयाँ पुगेको छ । कुल आयात १५.१६ प्रतिशतले बढेर १८ खर्ब ९४ अर्ब रुपैयाँ पुगेको छ भने निर्यात १२.२८ प्रतिशतले बढेर २ खर्ब ७७ अर्ब रुपैयाँ रुपैयाँ पुगेको छ ।
