एक दर्जन प्रसारण लाइनको अध्ययन सकियो

काडमाडौं । करिब एक दर्जन प्रसारण लाइन आयोजनाको अध्ययनको काम सकिएको छ । निर्माण सम्पन्न भएका, निर्माणाधीन र निर्माणमा जाने आयोजनाको विद्युत प्रवाह गर्ने उदेश्यले सरकार तथा निजी क्षेत्रले प्रसारण लाइन आयोजनाको निर्माण गर्न अध्ययन सकाएका हुन् ।

विद्युत विकास विभागका अनुसार विभिन्न जिल्लाको विद्युत प्रणालीमा जोड्नका लागि सरकार र निजी क्षेत्रले ११ प्रसारण लाइनको अध्ययन सकाएका छन् । अध्ययन पूरा भएको आयोजनाले निर्माण अनुमतिका लागि विभागमा आवेदन दिएका छन् ।

आवेदन दिएका लाइनमध्ये सबैभन्दा ठुलो २२० केभी क्षमताका एक आयोजना छ । यस्तै, १३२ केभी क्षमताका ४ र ३३ केभी क्षमताका ६ आयोजना छन् ।
सबैभन्दा ठुलो क्षमताका २२० केभीकाे सुपर त्रिशुली प्रसारण लाइनले निर्माण अनुमतिका लागि विभागमा आवेदन दिएको छ । यो आयोजना सुपर त्रिशुलीको स्यूचयार्डदेखि भरतपुर सबस्टेसनसम्म ३० किलोमिटर लामो छ ।

यो आयोजना ब्लू इनर्जीले अध्ययन पूरा गरेर निर्माण अनुमतिका लागि २०७६ भदौ २० गते आवेदन दिएको थियो । आवेदन दिएको करिब ३ वर्षसम्म पनि कम्पनीले अनुमति नपाएको विभागको तथ्याङ्कमा उल्लेख छ ।

नेपाल विद्युत प्राधिरणले १३२ केभी क्षमताका ३ प्रसारण लाइन अघि बढाउन अनुमतिका लागि आवेदन दिएको छ । प्राधिकरणले कालिगण्डकी–रिडी अघि बढाउन २०७८ मंसिर १५ गते, ढल्केबर–बालगंगा निर्माण गर्न गत माघ ४ गते र भुहमी–हकई निर्माण गर्न गत माघ १० गते आवेदन दिएको तथ्याङ्कमा उल्लेख छ ।

यस्तै, १३२ केभी क्षमताकै नार्माजुन मादी हिमालयन हाइड्रो पावरले निर्माण गर्न गत पुस १८ गते आवेदन दिएको छ । ३३ केभी क्षमताको गेलुङ खोला, अप्पर गड्डी, पुवा–२, घार खोला, झापा सोलार, रातोढुङ्गा अप्पर म्याग्दी–१ जलविद्युत आयोजनाको विद्युत जोड्न लाइन निर्माण अनुमतिका लागि आवेदन परेको विभागले जनाएको छ ।