ऊर्जा खबर
काठमाडौँ । अपर तामाकोशी हाइड्रोपावर लिमिटेडमा कार्यरत दोलखा जिल्लाबासी करार कर्मचारीहरूले आफूहरूलाई सेवा सुविधामा विभेद गरिएका भन्दै धर्ना तथा विरोधका कार्यक्रम सुरु गरेका छन् । २०८१ माघ मसान्तसम्ममा दोलखा जिल्लाबासी तथा अन्य जिल्लाका कार्मचारीहरूबीच सेवा सुविधामा रहेको विभेद हटाई एकरूपमा कामय गर्ने सम्बन्धमा २०८१ असोज ६ गते भएको सहमति कार्यान्वयन नभएकोले उक्त सहमति कार्यान्वयन गर्न माग गर्दै उनीहरू विरोधमा उत्रिएका हुन् ।
उक्त सहमति कार्यान्वयन गर्न आफूहरूले पटक–पटक स्मरण गराएको र ताकेता गरेको भए पनि सहमति कार्यान्यन गर्न व्यवस्थापन पक्ष इमानदार नभएको भन्दै आइतबार (चैत १० गते) बाट उनीहरू धर्ना तथा विरोध प्रदर्शनमा उत्रिएकाे जनाएका छन् ।
उनीहरूले दोलखाको गोंगरस्थित कार्यालयको कामकाजसमेत ठप्प पारेका छन् । आयोजनाको विद्युत् उत्पादनमा भने कुनै अवरोध नगर्ने गरी उनीहरूले आइतबार र सोमबार दोलखाबाहेक अन्य जिल्लाका सवारी चालक कर्मचारीद्वारा पोर्टलमा रहने गरी एउटा मात्र सवारी साधन सञ्चालन गर्न र चैत १२ गतेदेखि सहमति कार्यान्वयन नभएसम्मका लागि आपत्कालीन अवस्थाबाहेक कुनै पनि सवारी साधन चल्न नदिने भएका छन् ।
दोलखा जिल्लाबासी करार कर्मचारी संघर्ष समितिको अगुवाईमा यी जिल्लाका करार कर्मचारी प्रदर्शनमा उत्रिएका हुन् । उनीहरूले ‘सहमति तुरुन्त कार्यान्वयन गर । विभेद गर्न पाइँदै, दोलखाली स्थानीय कर्मचारीहरूलाई हेप्न पाइँदैन । हाम्रो आन्दोलन जारी छ ।’ जस्ता नारा लगाउँदै गोंगरस्थित कार्यालयमा विरोधसभासमेत गरेका छन् ।
