ऊर्जा खबर
काठमाडौँ । सानिमा माई हाइड्रोपावर लिमिटेडद्वारा प्रवर्द्धित २ जलविद्युत् केन्द्रको उत्पादन पुनः सुचारु भएको छ । गत असोजमा आएको भीषण बाढी र पहिरोका कारण क्षतिग्रस्त भएका २२ मेगावाटको माई र ७ मेगावाटको माई क्यास्केड जलविद्युत् केन्द्र मर्मतपछि पुनः सञ्चालनमा आएका हुन् ।
कम्पनीका अनुसार दुवै केन्द्रको उत्पादन फागुन १० गते बिहान १०ः४६ बजेदेखि सुचारु भएको हाे । २०८२ असोज १८ गते माई खोलामा आएको अविरल वर्षा, बाढी र पहिरोले केन्द्रको हेडवर्क्स (बाँध) क्षेत्रका संरचनामा क्षति पुर्याएपछि उत्पादन बन्द भएको थियो । बाढीले क्षति पुर्याएका हेडरेस कल्भर्ट र फ्लसिङ चेम्बरको मर्मत सम्भार तथा प्राविधिक परीक्षण सम्पन्न गरी सञ्चालनमा ल्याइएको हो ।
लामो समयदेखि उत्पादन बन्द हुँदा कम्पनीको आम्दानीमा प्रत्यक्ष असर परेको थियो । अब दुवै आयोजनाबाट कुल २९ मेगावाट विद्युत् राष्ट्रिय प्रसारण लाइनमा जोडिएसँगै कम्पनीको वित्तीय अवस्थामा सुधार आउने अपेक्षा गरिएको छ । कम्पनीले यसअघि घोषणा गरेको ‘विशेष परिस्थिति’ समेत अब अन्त्य भएको जानकारी दिएको छ ।
