ऊर्जा खबर
काठमाडौँ । राष्ट्रिय प्रसारण ग्रिड कम्पनी लिमिटेड (आरपिजिसिएल) ले निर्माण गरिरहेको १३२ केभीको मेवा–चाङ्गे (ताप्लेजुङ) प्रसारण लाइनको तार तान्ने काम सुरु भएको छ । कम्पनीका प्रमुख कार्यकारी अधिकृत (सिइओ) सागर श्रेष्ठले फागुन ५ गते एक कार्यक्रमका बीच तार तान्ने (स्ट्रिङिङ) कार्यको विधिवत् शुभारम्भ गरेका हुन् ।
हालसम्म आयोजनाको ७० प्रतिशत निर्माण कार्य पूरा भएको आयोजना व्यवस्थापक (प्रोजेक्ट म्यानेजर) प्रज्वल भट्टराईले ऊर्जा खबरसँग बताए । ‘प्रसारण लाइन आयोजना २०८३ को असारभित्र निर्माण पूरा गरी सञ्चालनमा ल्याउने तयारी छ,’ ऊर्जा खबरसँग उनले भने ।
उनका अनुसार २०७९ चैत ४ गतेबाट आयोजना निर्माण सुरु भएको थियो । कुल १ अर्ब ३३ करोड रुपैयाँ लागत अनुमान गरिएको आयोजनाको निर्माणको काम ठेकेदार कम्पनी कस्मिक इलेक्ट्रिकल लिमिटेडले गरिरहेको छ ।
प्रसारण लाइन ताप्लेजुङको मेवा सबस्टेसनबाट सुरु भएर ढुङ्गेसाँघु सबस्टेसनमा जोडिने छ । ५० किलोमिटर डबल सर्किटको उक्त लाइनबाट १५० मेगावाटसम्म विद्युत् प्रसारण गर्न मिल्ने कम्पनीले जनाएको छ ।
यही प्रसारण लाइनबाट विद्युत् प्रवाह गर्ने गरी १२५ मेगावाट बराबरका ७ वटा जलविद्युत् आयोजनाको निर्माण भइरहेको छ । यी मध्ये ३१.९ मेगावाटको माथिल्लो मेवा ‘ए’, २३ मेगावाटको युनियन मेवा, २१ मेगावाटको पालुङ खोला स्मल, ९ मेगावाटको सोना खोला र ६.६ मेगावाटको तल्लो मेवाको विद्युत् यही लाइनबाट प्रवाह गर्न समझदारी (एमओयू) भइसकेको उनले बताए । त्यस्तै, यसै क्षेत्रमा निर्माण हुन लागेको ३० मेगावाटको पालुङ खोला–१ र सुपर पालुङको विद्युत् प्रवाहसमेत यही लाइनबाट गरिने भएपछि समझदारी हुन बाँकी छ ।
उनका अनुसार प्रसारण लाइनको अनुमतिपत्र १५० मेगावाटसम्म रहे पनि करिब २०० मेगावाटसम्म विद्युत् प्रवाह गर्न मिल्ने भएकाले आगामी दिनमा यस क्षेत्रमा बन्ने अन्य आयोजनाको विद्युत् समेत प्रवाह गर्न मिल्ने छ ।
