ऊर्जा खबर
काठमाडौँ । नेपाल विद्युत् प्राधिकरणले पर्वतको नयाँ मोदी सबस्टेसनदेखि कुश्मा-तल्लो मोदी सबस्टेसनसम्म ८.५१ किलोमिटर लामो प्रसारण लाइन बनाउन प्रक्रिया अघि बढाएको छ । यसका लागि प्राधिरकणले विद्युत् विकास विभागमा आवेदन दिएको छ । प्राधिकरणले २०० मेगावाटसम्म विद्युत् प्रवाह हुने गरी १३२ केभी डबल सर्किटको उक्त प्रसारण लाइन निर्माण गर्न विभागमा आवेदन दिएको हो ।
प्राधिकरणले पर्वतको मोदी गाउँपालिका–२ केरुङ्गास्थित नयाँ मोदी सबस्टेसनदेखि कुश्मा नगरपालिका–७ राहाते चिसापानीमा रहेको कुश्मा–तल्लो मोदीसम्म उक्त प्रसारण लाइन निर्माण गर्न लागेको जनाएको छ ।
प्राधिकरणका अनुसार विभागबाट स्वीकृति प्राप्त भए लगत्तै आयोजनाको काम पनि अघि बढाइनेछ ।
प्रस्तावित लाइन निर्माण तथा सञ्चालन गर्दा उल्लेखनीय प्रतिकुल असर पर्ने भए सूचना प्रकाशित भएको ३५ दिनभित्र सरोकारवालाले विभाग तथा प्रवर्द्धक कम्पनीमा आइपुग्नेगरी लिखित राय–सुझाव पेश गर्न पनि आग्रह गरिएको छ ।
प्रस्तावित लाइनअन्तर्गत ३७ वटा टावर खडा गरिनेछ । टावरहरुको उचाई ३२–४१ मिटरसम्म रहने तथा टावरहरू बीचको दूरी ४१.३६५ मिटरसम्म हुनेछ ।
आयोजना निर्माणका लागि कुल १५.३२ हेक्टर जमिन आवश्यक पर्छ । त्यसध्ये ३७ वटा टावरका लागि ०.९४७ हेक्टर र यसबाहेक विद्युत मार्गको क्षेत्रधिकार अन्तर्गत १४.३७३ हेक्टर जग्गा आयोजनाका लागि आवश्यक पर्नेछ ।
प्राधिकरणले उक्त प्रसारण लाइन आयोजनको काम साढे ३ वर्षभित्र सम्पन्न गर्ने लक्ष्य राखेको छ । आयोजना निर्माण तथा सञ्चालन गर्दा भू–क्षय, बाढी, वायु प्रदुषण आदिद्वारा वातावरणमा उल्लेखनीय प्रतिकुल असर नपर्ने गरी निर्माण गरिने जनाएको छ ।
