ऊर्जा खबर
काठमाडौं । तुम्लिङटार–प्याउली ३३ केभी प्रसारण लाइन निर्माण सम्पन्न भएको छ । नेपाल विद्युत प्राधिकरणले संखुवासभाको तुम्लिङटारदेखि भोजपुरको प्याउलीसम्मको करिब २४ किलोमिटर लाइन पूरा गरेको हो ।
ढेड वर्षअघि देखि निर्माण सुरु भएको लाइनको काम सम्पन्न भएको प्राधिकरण भोजपुर वितरण केन्द्र प्रमुख पुरुषोत्तम रेग्मीले बताए । उनका अनुसार स्थानीयबासीका लागि गुणस्तर विद्युत सेवा वितरण गर्नका लागि निर्माण गरिएको लाइन सम्पन्न भएको हो ।
‘लाइनको काम सबै पुरा गरेर आज (बुधबार) देखि परीक्षण गर्ने योजना थियो,’ उनले ऊर्जाखबरसँग भने, ‘तर भारी वर्षा परेकोले परीक्षण रोकिएको छ ।’ अब मौसम सफा भएपछि परीक्षण प्रसारण गरिनेछ ।
लाइनमा करिब ६ सय बढी पोल खडा गरिएको केन्द्रले जनाएको छ । जिल्लाका स्थानीयलाई गुणस्तर र भरपर्दाे विद्युत सेवा वितरण गर्न यो लाइन निर्माण गरिएको हो । यसअघि धनकुटा–हिले–भोजपुर प्रसारण लाइन बाट विद्युत ल्याएर वितरण गरिएको थियो ।
लाइनमा सयमसमयमा ट्रिपिङ हुने लगायतका समस्या आएपछि यो लाइन निर्माण गरिएको हो । यो लाइन सञ्चालनमा आएपछि स्थानीयले भरपर्दाे र गुणस्तर विद्युत सेवा पाउनेछन् ।
