ऊर्जा खबर
.jpg)
काठमाडौं । ट्रंक लाइन र डेडिकेटेड लाइनको विद्युत् महसुल नतिर्ने उद्योगहरूको बिजुलीको लाइन काटिने भएको छ । प्राधिकरणले बारम्बार ताकेता गर्दा पनि बक्यौता नबुझाउने उद्योगको लाइन काट्न लागिएको हो ।
विहिबार प्रधानमन्त्री पुष्पकमल दाहालले बक्यौता राख्ने जुनसुकै उद्योगको लाइन काट्न निर्देशन दिएपछि लाइन काट्ने तयारी गरिएको नेपाल विद्युत् प्राधिकरणका उपकार्यकारी निर्देशक मनोज सिलवालले जानकारी दिए ।
‘अब हामी कार्यकारी निर्देशकसँग पनि बसेर एक पटक छलफल गर्छाै । के कस्तो अवस्था छ, बुझ्छौ,’ उनले भने, ‘एक पटक प्राधिकरणको आन्तरिक छलफलपछि लाइन काट्न सुरु गर्छाै’ । उद्योगी तथा व्यवसायीले हालसम्म डेडिकेटेड र ट्रंक लाइन बापतको २२ अर्ब १६ करोड भन्दा बढी रकम प्राधिकरणलाई तिर्न बाँकी रहेको पनि सिलवालले बताए ।
२०७२ सालमा नेपालमा चरम ऊर्जा संकट हुँदा पनि प्राधिकरणले उद्योग तथा कलकारखानालाई सहज रुपमा विद्युत आपूर्ति गर्नका लागि डेडिकेटेड र ट्रंक लाइन सुविधा उपलब्ध गराएको थियो ।
२०७५ सालमा लोडसेडिङ अन्त्य भयो । यो सँगै २०७७ असार १ गतेबाट डेडिकेटेड र ट्रंक लाइन सम्बन्धी रकम बुझाउनुपर्ने व्यवस्था नै हट्यो । यो पछि प्राधिकरणले बक्यौता भुक्तानी गर्नुपर्ने बताएपनी उद्योगीले तिर्न मानेका थिएनन् । उद्योगी व्यवसायी र प्राधिकरणबीच यो विषयमा लामो समय देखि विवाद चल्दै आएको थियो । हालसम्म ५८ वटा उद्योगले बक्यौता भुक्तानी गर्न बाँकी रहेको प्राधिकरणले जनाएको छ ।
