ऊर्जा खबर
काठमाडौं । सुपर मादी हाइड्रो पावर लिमिटेडको सेयरमा माग भन्दा बढी आवेदन परेपछि कम्पनीले सेयर निष्कासन बिक्री बन्द गर्ने भएको छ । कम्पनीले स्थानीयका लागि गत मंसिर २० गतेदेखि खुल्ला गरेको सेयर आवेदन आज बिहीबार साझ ५ बजेबाट बन्द लागेको हो ।
सय रुपैयाँ अंकित १० करोड ५० लाख रुपैयाँ बराबरको १० लाख ५० हजार कित्ता सेयर निष्कासन गरेको कम्पनीले जनाएको छ । कम्पनीका अनुसार निष्कासन हुने सेयरमध्ये आयोजना अति प्रभावित क्षेत्र जिल्लाको मादी गाउँपालिकाको वडा नम्बर १ र २ का स्थानीयका लागि ३ लाख १५ हजार कित्ता र अन्य वडा नम्बर ३, ४, ५, ६, ७, ८, ९, १०, ११, १२ तथा पोखरा महानगरपालिकाको वडा नम्बर २६, २७ र २८ का स्थानीयका लागि ७ लाख ३५ हजार कित्ता सेयर निष्कासन गरेको हो ।
कम्पनीले स्थानीयका लागि ढिलोमा पुस २० गते सम्म आवेदन अवधि तोके पनि माग भन्दा बढी आवेदन परेकोले आज (पुस ७ गते) साझ ५ बजेदेखि निष्कासन तथा बिक्री बन्द गर्न लागेकोे हो ।
कम्पनीको सेयर निष्कासन गरी बाँडफाँड गर्न सानिमा क्यापिटल लिमिटेडलाई बिक्री प्रबन्धक तोकिएको छ । कम्पनीले निर्माण गरिरहेको आयोजनाको काम अन्तिम चरणमा पुगेको छ ।
