सेवा प्रदायकलाई प्राधिकरणको ताकेता, संरचना प्रयोग गर्न पुस ७ गतेभित्र सम्झौता गर्नुपर्ने

काठमाडौं । नेपाल विद्युत प्राधिकरणले आगामी पुस ७ गतेभित्र विद्युतीय संरचनाको उपयोगका लागि नियमानुसार सम्झौता गर्न नआउने सेवा प्रदायकहरूलाई कारबाही गर्ने भएको छ । प्राधिकरणले संरचनाहरू प्रयोग गर्ने टेलीफोन, केबल टीभी र इन्टरनेट सेवा प्रदायकलाई आगामी एक महिनाभित्र नविकरण गरिसक्न निर्देशन दिएका हो ।

प्राधिकरण वितरण तथा ग्राहक सेवा निर्देशनालयले सूचना सार्वजनिक गरी तोकिएको समयभित्र नियमानुसार सम्झौता नगर्ने, सकिएको सम्झौता नविकरण नगर्ने तथा अहिलेसम्मको विद्युतीय संरचना उपयोग गरी भाडा भुक्तानी नगर्ने सेवा प्रदायकलाई कारबाही गर्ने  जनाएकाे छ।

‘सेवा प्रदायकहरूलाई विद्युतीय संरचना उपयोगका लागि नियमानुसार सम्झौता गर्न बोलाइएको छ’, सूचनामा भनिएको छ ‘सम्झौता गर्न नआउनेलाइ प्राधिकरणको नियमाअनुसार कारबाही गरिनेछ ।’

प्राधिकरणका अनुसार केही सेवा प्रदायकहरूले अहिलेसम्म भाडादर भुक्तानी गरेका छैनन् । अब नियमानुसार मात्रै विद्युतीय संरचना सेवा प्रदायकलाई उपयोग गर्न दिइने हुँदा नयाँ सम्झौता  तथा नवीकरण गर्ने सेवाप्रदायकलाई अहिलेसम्मको भाडा रकम सबै भुक्तानी गर्न पनि प्राधिकरणले आग्रह गरेको छ ।

सेवा प्रदायकहरूलाई प्राधिकरणसँग सम्झौता नभएसम्म नयाँ लाइन विस्तारको काम नगर्न सूचनामा भनिएको छ । प्राधिकरणले २०७५ मा विद्युतीय  पोल र अप्टिकल फाइबरको भाडा दर बढाएपछि सेवा प्रदायकले त्यसको विरोध जनाउँदै भाडा तिर्न अटेर गरेका थिए ।

थप जानकारीका लागि :