ऊर्जा खबर
काठमाडौं । सुम्निमा हाइड्रो पावर कम्पनी लिमिटेडले ४.९ मेगावाटको माथिल्लो पिखुवा खोला जलविद्युत आयोजना निर्माण अनुमतिका लागि विद्युत विकास विभागमा आवेदन दिएको छ । कम्पनीले प्रदेश नम्बर १ भोजपुर जिल्लाको ट्याम्केमैयुम गाउँपालिकामा अवस्थित पिखुवा र बुन्खुवा खोलामा पहिचान भएकाे आयाेजना अघि बढाउन अनुमति माग गर्दै आवेदन दिएकाे हाे ।
कम्पनीले अनुमतिपत्रका लागि विभागमा आवेदन दिएपछि यसबाट पर्ने असरका विषयमा सरोकारवाला निकायसँग राय सुझाव माग गरिएको छ । विभागले ३५ दिने सूचना जारी गर्दै उक्त अवधिभित्र सुझाव दिन आग्रह गरेको छ ।
कम्पनीले निर्माण गर्न लागेको आयोजनाको संरचनाहरू पिखुवा र बुन्खुवा खोलाको दायाँ किनारामा रहनेछ । नदी बहावमा आधारित (रन अफ रिभर) प्रकारको आयोजनाबाट वार्षिक सरदर २९.६० गिगावाट घण्टा विद्युत उत्पादन हुने अध्ययनले देखाएको छ ।
आयोजनाको लागि आवश्यक पानी फर्काउन १५ मिटर लामो लम्बाई र २.५ मिटर लामो उचाईको डाईभर्सन निर्माण गरिनेछ । विद्युतगृह नजिकै आउटडोर स्वीचयार्ड निर्माण गरिनेछ र यस आयोजनाबाट उत्पादित विद्युत ३३ केभी प्रसारण लाइन मार्फत ३४ किलोमिटर लामो दुरी रहेको नेपाल विद्युत प्राधिकरणको बानेश्वर सबस्टेसनमा जोडिनेछ ।
यो आयोजना २०८२ सम्ममा सम्पन्न गर्ने लक्ष्य लिएको छ । आयोजना निर्माण तथा सञ्चालन गर्दा भू–क्षय, बाढी, वायु प्रदूषणद्वारा वातावरणमा उल्लेखनीय असर नपर्ने गरी निर्माण गरिनेछ ।
