ऊर्जा खबर
काठमाडाैं । विद्युत नियमन आयोगले गण्डकी प्रदेशको गोरखा जिल्लामा निर्माण हुन लागेको बुढीगण्डकी–क र बुढीगण्डकी–ख जलविद्युत आयोजनाको विद्युत खरिद सम्झौता (पिपिए) दर निर्धारण गर्न सार्वजनिक सुनुवाई गर्ने भएको छ । आयोगले चैत ९ गते (बिहीबार) यी आयोजनाको पिपिए दर निर्धारणका लागि नेपाल विद्युत प्राधिकरणबाट पेश भएको निवेदन उपर सार्वजनिक सुनुवाई गर्ने भएको हो ।
नौलो नेपाल हाईड्रोइलेक्ट्रिक लिमिटेडद्धारा पवर्द्धित १०३.४ मेगावाटको बुढीगण्डकी-क र २२६ मेगावाटको बुढीगण्डकी-ख जलविद्युत आयोजनाबाट उत्पादन हुने विद्युतको खरिदबिक्री दर निर्धारण तथा विद्युत खरिद सम्झौतामा सहमतिको लागि पेश भएको निवेदन उपर छलफल गर्न सार्वजनिक सुनुवाई कार्यक्रमको आयोजना गर्न लागिएको आयोगले जनाएको छ ।
उपभोक्ता, उद्योगी, व्यवसायी, स्थानिय बासिन्दा, प्रतिनिधिमूलक संस्थाहरू, सञ्चार माध्यम, स्थानीय तहका प्रतिनिधि, तथा सरोकारवालाहरूलाई सो कार्यक्रमा सहभागी हुन आह्वान गरिएको छ । साथै, सरोकारवालाहरूले आयोगको कार्यालयमा लिखित रुपमा समेत आफ्ना राय, सुझाव तथा प्रतिकृया पेश गर्न सक्नेछन ।
बुढीगण्डकी–क र ख दुवै आयोजनाका लागि वर्षायाममा प्रतियुनिट ४.८० रुपैयाँ र सुख्खा याममा पिकिङ अवधिभर प्रतियुनिट १०.५५ रुपैयाँ र नन पिकिङ अवधिका लागि प्रतियुनिट ८.४० रुपैयाँ कायम गर्ने गरी प्राधिकरणले प्रस्ताव गरेको छ ।
बुढीगण्डकी ख आयोजना पूरा भएपछि वार्षिक १२१४.१२ गिगावाट घन्टा विद्युत उत्पादन हुनेछ । आयोजना पूरा गर्न ५७९९.२६ करोड लागत अनुमान गरिएको छ । बुढीगण्डकी–क पूरा भएपछि वार्षिक ५४१.३७ गिगावाट घन्टा विद्युत उत्पादन हुनेछ । यो आयोजना पूरा गर्न ३१३२.०१ करोड लागत अनुमान गरिएको छ ।
सुनुवाई कार्यक्रम चैत ९ गते (बिहीबार) सानो गौचरणस्थित विद्युत विकास विभागको सभाहलमा दिउँसाे १२ बजेदेखि ४ बजेसम्म हुनेछ ।
