आइपीओ रोकिँदा ३० भन्दा धेरै आयोजना समस्यामा परे : अध्यक्ष कार्की 

काठमाडाैँ । स्वतन्त्र ऊर्जा उत्पादकहरूको संस्था (इपान) का अध्यक्ष गणेश कार्कीले १४ महिनामा ३० भन्दा बढी आयोजनाहरूको आईपीओका लागि धिताेपत्र बाेर्ड (सेबाेन)मा रोकिएको बताएका छन् ।

बुधवार स्वतन्त्र ऊर्जा उत्पादकहरूको संस्था, नेपाल -इपान) र उपायले आयोजना गरेको कार्यक्रममा बोल्दै अध्यक्ष कार्कीले यस्तो बताएका हुन् । 
उनले पछिल्लो समय शेयरमार्फत जलविद्युत्‌मा नेपालभित्र लगानी गर्ने वातावरण बनाउनुपर्ने बताए । 

उनले भने, 'विगत १४ महिना भन्दा बढी ३० भन्दा बढी आयोजनाहरू सेवनमा रोकिएको छ । जलविद्युत् आयोजनामा ३० प्रतिशत लगानी आईपीओबाट सङ्कलन गर्ने योजना बनाएका हुन्छौँ । आईपीओबाट पनि आउन सकेन र इकुटी हालेर पनि आयोजनाहरू अगाडि लैजान सकिएको छैन ।'

उनले जलविद्युत् आयोजनामा ३० प्रतिशत लगानी आईपीओबाट संकलन गर्ने योजना बनाए पनि आईपीओ रोकिँदा आयोजना आयोजनाहरू समस्यामा परेको बताएका हुन् ।

अध्यक्ष कार्कीले १ हजारबाट अहिले ५ हजार लगानी गर्नसक्ने वातावरण बनेको बताउँदै पुँजी बजारमा करिव ४५ लाख बढी नेपालीहरूले जलविद्युत्‌काे शेयरमा लगानी गरेको बताए । उनले स्थायी सरकार बनेकाले अब केही काम हुने आशा व्यवसायीहरूमा पलाएको पनि बताए । 

उनले जलविद्युत क्षेत्रको विकास गर्न व्यवसायीहरू उत्साहित भएपनि पछिल्लो समय धेरै समस्याहरू आइरहेको पनि कार्कीले बताए । उनले विद्युत् विधेयक जस्ताको त्यस्तै पास भए व्यवसायी पलायन हुनुपर्ने बताउँदै विधेयकले जलविद्युत् विकास गर्ने तर नेपालका निजी क्षेत्रको लगानी निरुत्साहित गर्ने बताए ।