निजी साझेदारी लगानी प्रवर्द्धन गर्न लगानी बोर्ड र युएनडिपीबीच समझदारी

काठमाडौं। साझा हितका क्षेत्रमा सहकार्य गर्ने उद्देश्यसहित लगानी बोर्ड नेपाल र संयुक्त राष्ट्र संघीय विकास कार्यक्रम (युएनडिपी) बीच आज (चैत ८ गते) समझदारीपत्रमा हस्ताक्षर भएकाे छ । समझदारीपत्रमा बोर्डका प्रमुख कार्यकारी अधिकृत सुशील भट्ट र यूएनडिपीका आइसानी मेदागान्गोदा लाबेले हस्ताक्षर गरेका छन् ।

समझदारीपत्रमा संस्थागत क्षमता अभिवृद्धि गर्ने, सार्वजनिक निजी साझेदारी र निजी लगानी प्रवर्द्धनमा सहकार्य गर्ने उल्लेख छ । नेपालमा सार्वजनिक-निजी साझेदारी, निजी क्षेत्रको लगानी र समिश्रित वित्तका माध्यमबाट लगानी प्रवर्द्धन गर्दै वित्तीय न्यूनतालाई पूर्ति गरी दिगो विकास लक्ष्य हासिल गर्न यो सहकार्यले सहयोग पुर्याiउने अपेक्षा गरिएको  छ।

परियोजना विकासमा सामाजिक र वातावरणीय प्रभाव मूल्याङ्कन मापदण्ड, परियोजना विकास सम्झौता (पिडिए) र परियोजना लगानी सम्झौता निर्माणमा अध्ययन अनुसन्धान गर्ने र त्यस्तो कार्यको लागि सहयोग स्थापित गर्ने कुरा समेत समझदारीपत्रमा उल्लेख छ । बोर्डको सेवा प्रवाहलाईअझ प्रभावकारी बनाउन स्तरीय सञ्चालन प्रणाली विकास गर्न सहकार्य गर्ने लगायतका अन्य सहकार्य गर्न सकिने क्षेत्रमा संयुक्त रुपमा अघि बढ्ने समेत समझदारीपत्रमा उल्लेख छ।