ऊर्जा खबर
काठमाडौं । नवीकरणीय ऊर्जाकाे विकासमा साझेदारी गर्न वैकल्पिक ऊर्जा प्रवर्द्धक केन्द्र (एइपिसी ) र नवीकरणीय ऊर्जा परिसंघबीच समझदारी भएकाे छ । एइपिसी र परिसंघबीच मंगलबार समझदारी पत्रमा हस्ताक्षर भएकाे हाे ।
समझदारी पत्रमा एइपिसीका कार्यकारी निर्देशक डा.मधुसुधन अधिकारी र परिसंघका अध्यक्ष गुणराज ढकालले हस्ताक्षर गरे । समझदारी अनुसार एइपिसी परिसंघका साझा चासोका विविध विषयमा दुवै पक्षले एक अर्कालाई सहयोग एवं समन्वय र सहकार्य गर्नेछन् ।
परिसंघले नविकरणीय ऊर्जाको प्रवर्द्धन सम्बन्धित अध्ययन तथा अनुसन्धान, क्षमता अभिवृद्धि, अन्तरक्रिया, बहस पैरवी जस्ता एइपिसीसँग सहकार्य तथा समन्वय गर्नेछ ।
एइपिसीले परिसंघसँगकाे सहकार्यमा नवीकरणीय ऊर्जाकाे विकासको लागि सम्बन्धित सरोकारवालासँग हातेमालो गर्दै अघि बढ्ने अधिकारीले बताए । उनले सबै जनतामा स्वच्छ ऊर्जा र विद्युतको पहुँच पुर्याउन साझेदारी र सहकार्यलाई प्राथमिकता दिइने बताए ।
नवीकरणीय ऊर्जा क्षेत्रको अध्ययन अनुसन्धान, जनचेतना अभिवृद्धि, प्रविधि प्रवद्र्धन जस्ता क्षेत्रमा निजी क्षेत्रको भुमिका रहने भएकोले यस्ता क्रियाकलापमा सहकार्यबाट संस्थागत सुदृढीकरणमा सघाउ पुग्ने परिसंघका अध्यक्ष ढकालले बताए ।
