ऊर्जा खबर
काठमाडौं । सान्जेन जलविद्युत कम्पनीले स्थानीयका लागि खुल्ला गरेको सेयर आवेदन अवधि थप गरेको छ । कम्पनीले आयोजना प्रभावित स्थानीयका लागि भदौ ५ गतेदेखि खुल्ला गरेको सेयर आवेदन अवधि असोज ३० गते सम्मका लागि पुन थप गरेको हो ।
कम्पनीले यस अघि पनि माग अनुसारको आवेदन नपरेपछि असोज ४ गतेसम्मका लागि आवेदन अवधि थप गरेको थियो । उक्त सयममा कम्पनीको माग अनुसारको आवेदन नपरेपछि पुन आवेदन अवधि थप गरेको कम्पनीले जनाएको छ । कम्पनीका अनुसार प्रभावित स्थानीयका लागि सय रुपैयाँ अंकित ३६ लाख ५० हजार कित्ता सेयर निष्कासन गरिएको छ ।
कम्पनीले जिल्लाको अति प्रभावित आमाछोदीङमो गाउँपालिका वडा नम्बर ५, प्रभावित वर्ग आयोजनाले निर्माण गर्ने लाइनबाट प्रभावित सोही पालिका वडा नम्बर ४, सामान्य प्रभावित सोही पालिकाको वडा नम्बर १, २ र ३ र न्यून प्रभावित जिल्लाको बाँकी सम्पूर्ण बासिन्दाका लागि सेयर निष्कासन गरेको छ ।
न्यून प्रभावित स्थानियले अतिप्रभावित सरह सेयर माग गर्दै साउन २९ गते कम्पनीको साइड कार्यालय, गाडी मोटरसाइकल तोडफोड गरी कर्मचारीलाई कुटपिट गरेका थिए । तर, २०७६ माघ २५ गते बसेको वैठकको निर्णय अनुसारनै आयोजनाबाट अति प्रभावित, प्रभावित, सामान्य प्रभावित, र न्यून प्रभावित क्षेत्र छुट्याइएको छ, त्यही अनुसार नेपाल धितोपत्र बोर्डबाट स्विकृति पाइसकेकोले अब परिवर्तन गर्न नमिल्ने भन्दै सेयर आवेदन खुल्ला गरेको थियो ।
आयोजना प्रभावित स्थानीयले न्यूनतम १० कित्तादेखि अधिकतम ७०० कित्तासम्म आवेदन दिन पाउने कम्पनीले जनाएको छ । आवेदकले असोज ३० गतेसम्म आवेदन दिन पाउनेछन् ।
कम्पनीले रसुवाको आमाछोदीङमोे गाउँपालिकामा १४.८ मेगावाटको माथिल्लो सान्जेन र ४२.५ मेगावाटको सान्जेन जलविद्युत आयोजना निर्माण गरिरहेको छ । आयोजनाबाट चालु आर्थिक वर्षभित्र उत्पादन सुरू गर्ने कम्पनीको लक्ष्य छ ।
.jpg)
