सानीगाड हाइड्रोको सेयर प्रत्याभूतिकर्तामा नागरिक लगानी कोष

काठमाडौँ । ३८.४६ मेगावाटको माथिल्लो कालंगा गाड जलविद्युत् आयोजनाको प्रवर्द्धक कम्पनी सानीगाड हाइड्रो लिमिटेडको सेयर प्रत्याभूतिकर्तामा नागरिक लगानी कोष नियुक्त भएको छ । कम्पनीले आयोजना प्रभावित स्थानीय र सर्वसाधारणका लागि निष्कासन गर्न लागेको सेयर प्रत्याभूतिकर्तामा लगानी कोषलाई नियुक्त गरेको हो ।

कम्पनीका अध्यक्ष राजेश श्रेष्ठ र नागरिक लगानी कोषका कार्यकारी निर्देशक पर्वतकुमार कार्कीले उक्त नियुक्तसम्बन्धी सम्झौता पत्रमा हस्ताक्षर गरेका छन् । कम्पनीले बझाङमा निर्माण गरी सञ्चालनमा ल्याएको आयोजनाको सेयर निष्कासन प्रक्रिया अघि बढाइएको छ । उक्त आयोजनाको ८५ करोड ५० लाख रुपैयाँ बराबरको ८५ लाख ५० हजार कित्ता प्राथमिक सेयर (आइपिओ) कम्पनीले जारी गर्न लागेको हो । आयोजनाको विद्युत् १३२ केभी प्रसारण लाइन मार्फत नेपाल विद्युत् प्राधिकरणको बझाङ सबस्टेसन जोडिएको छ ।