ऊर्जा खबर
काठमाडौं । ताप्लेजुङको फक्ताङलुङ गाउँपालिकाको वडा नम्बर ७ मा पहिचान भएको ६० मेगावाटको माथिल्लो तमोर ‘ए’ जलविद्युत आयोजना निर्माण गर्न करिब १३ अर्ब रुपैयाँ लागत लाग्ने भएको छ । आयोजनाको वातावरणीय प्रभाव मुल्यांकन (इआइए) प्रतिवेदनका अनुसार आयोजना निर्माण पूरा गर्न साे लगानी आवश्यक पर्ने देखिएको हो ।
प्रवर्द्धक युनियन हाइड्रो पावर लिमिटेडले तयार पारेको इआइए प्रतिवेदनअनुसार आयोजना सम्पन्न गर्न १२ अर्ब ८५ करोड ९० लाख रुपैयाँ लाग्ने देखिएको छ । जसअनुसार प्रतिमेगावाट लागत २२ करोड २१ लाख रुपैयाँ लाग्ने कम्पनीले जनाएको छ ।
कम्पनीको आयोजना सम्भाव्यता अध्ययन भइसकेको छ भने इआइए प्रतिवेदन स्वीकृतिका लागि वन तथा वातावरण मन्त्रालय पठाइसकेको कम्पनीले जनाएको छ ।
आयोजनासम्म पुग्नका लागि करिब २० किलोमिटरको पहुँचमार्ग निर्माण गर्नुपर्ने छ । आयोजना निर्माणका लागि वन क्षेत्रको ११.५९२ हेक्टर स्थायी र ७.५८२ हेक्टर अस्थायी जग्गा अधिग्रहण गरिनेछ । आयोजनाको ग्रस हेड ९६८ मिटर र नेट हेड ९४३.७२ मिटर हुनेछ ।
हेडरेस सुरङ
आयोजनामा दुई वटा हेडरेस सुरुङ निर्माण हुनेछ । हेडरेस सुरुङ–१ को लम्बाई १९५४ मिटर रहनेछ भने हेडरेस सुरुङ २ को लम्बाई ४६८६ मिटर लामो हुनेछ ।
प्रसारण लाइन
आयोजनाबाट उत्पादन भएको विद्युत १३२ केभी प्रसारण लाइनमार्फत १५ किलोमिटर दुरीमा रहेको नेपाल विद्युत प्राधिकरणको २२०/१३२/३३ केभी ढुंगेसाँघु सबस्टेसनमार्फत राष्ट्रिय प्रसारण प्रणालीमा समाहित गरिनेछ ।
ऊर्जा उत्पादन
यो आयोजनाबाट वार्षिक ३३३.८२२ गिगावाट घन्टा विद्युत उत्पादन हुनेछ । सुक्खायाममा १००.३०७ गिगावाट घन्टा र बर्षायाममा २३३.८२२ गिगावाट घण्टा विद्युत उत्पादन हुने प्रतिवेदनमा उल्लेख छ ।
