सागर केसी
दोलखा । बाढीले दोलखामा निर्माणाधीन २ जलविद्युत् आयोजनामा क्षति पुगेको छ । विगु गाउँपालिका–८ मा निर्माणाधीन २५ मेगावाटका २ जलविद्युत् आयोजनामा क्षति पुगेको हो ।
कालिञ्चोक गाउँपालिका–१ र थामीचागुबाट आउने सोरूङ खोलामा आएको बाढीले २० मेगावाटको साँघु खोला जलविद्युत् आयोजना र ५ मेगावाटको कालिञ्चोक जलविद्युत् आयोजनामा क्षति पुगेको हो । माथिल्लो क्षेत्रमा भारी वर्षा भएपछि खोलामा आएको बाढी आएको हो । निर्माणको अन्तिम चरणमा पुगेको आयोजनामा क्षति पुर्याउँदा आयोजनाको उत्पादनको समय पछि धकेलिने भएको छ ।
२० मेगावाटको साँघु खोला जलविद्युत् आयोजनाको पेनस्टक पाइप र टेलरेसमा क्षति पुगेको आयोजनाका प्रबर्द्धक हिमपर्वत हाइड्रोपावर लिमिटेडका अध्यक्ष हिमाल गुरूङले जानकारी दिए । हिमपर्वतले यही साउन महिनाभित्रै विद्युत उत्पादन गर्ने लक्ष्यका साथ आयोजनाको काम अन्तिम चरणमा पुर्याएको थियो । बाढीले साउन भित्रै विद्युत् उत्पादन गर्ने लक्ष्यमा ठेस पुगेको उनले बताए ।
हाल बाढीले बगाएको र क्षति पुगेको ठाउँको लगत सङ्कलन र मूल्याङ्कनको काम जारी रहेको रहेको उनले जानकारी दिए । कालिञ्चोक जलविद्युत् आयोजनाको भने हेडवर्क्समा रहेका बाँध, इन्टेक र बालुवा थिग्य्राउने पोखरीमा क्षति भएको छ । बाढीले पेनस्टक पाइपको केही भागसहित निर्माण सामग्री समेत बगाएको छ ।
कालिञ्चोक हाइड्रोपावर कम्पनीकी अध्यक्ष इन्दिरा पन्तले आउँदो वर्षाअघि नै आयोजनाबाट विद्युत उत्पादन गर्ने लक्ष्य राखेर काम गरे तापनि बाढीका कारण आयोजनाको काम केही महिना धकेलिने भएको जानकारी दिइन् ।
खोलामा बाढीको तीव्र बहाब कायमै रहेकाले क्षतिको लगन सङ्कलनमा समेत कठिनाइ भइरहेको उनको भनाइ छ । बाढीले आयोजनासम्म पुग्ने प्रवेश सडकसमेत अवरुद्ध भएको छ ।
