ऊर्जा खबर
काठमाडौं । तनहुँ हाइड्रो पावर लिमिटेडले १२६ मेगावाटको तल्लो सेती (तनहुँ) जलविद्युत आयोजना निर्माण गर्ने भएको छ । नेपाल विद्युत प्राधिकरण सहायक कम्पनीले तनहुँ जिल्लामा पहिचान भएको आयोजना अघि बढाउन लागेको हो ।
निर्माणाधीण १४० मेगावाटकाे तनहुँ जलाशययुक्त जलविद्युत आयोजनाको टेलरेसबाट १८ किलोमिटर तल्लो तटिया क्षेत्रमा अवस्थित बन्दीपुर गाउँपालिकाका वडा नम्बर ६ तथा देवघाट गाउँपालिका वडा नम्बर ३ मा अवस्थित साराङ्गघाट नजिक सेती नदीमा आयोजना निर्माण गर्न लागिएकाे हाे । आयोजनाकाे ३२ मिटर अग्लो बाँध निर्माण गरिने कम्पनीले जनाएको छ ।
कम्पनीका अनुसार पानीको प्रवाहलाई देवघाट गाउँपालिकाको वडा नम्बर ३ र ४ हुँदै जाने ६.८ किलोमिटर लामो सुरुङग मार्ग मार्फत नदीको प्रवाहलाई फकाई त्रिशुली र सेती नदीको संगमदेखि करिब १.५ किलोमिटर तल्लो तटिया क्षेत्रमा पर्ने देवघाट गाउँपालिका वडा नम्बर ४ मा त्रिशुली नदीको दाया किनारामा बन्ने विद्युतगृहमा पानीलाई खसालीनेछ ।
कम्पनीले निर्माण गर्न लागेको १२६ मेगावाटको तल्लो सेती जलविद्युत आयोजनाको वातावरणीय प्रभाव मुल्याङ्कन प्रतिवेदन तयार पार्न सार्वजनिक सुनुवाई गर्न लागिएकाे छ । आयोजना निर्माण तथा सञ्चालन गर्दा बन्दीपुर गाउँपालिका, ब्यास नगरपालिका, देवघाट नगरपालिका, ऋषिङ्ग गाउँपालिका, आँबुखैरेनी गाउँपालिका र चितवन जिल्लाको भरतपुर महनगरपालिकामा प्रभाव पर्न सक्ने कम्पनीले जनाइएको छ ।
प्रस्तावित आयोजनाको सार्वजनिक सुनुवाई असार १४ गते आम समूह भवन बन्दीपुर गाउँपालिकामा हुनेछ । परामर्शदाता तनहुँ हाइड्रो पावर लिमिटेड रहेको छ ।
आयोजना निर्माण थालेको ४ वर्षमा व्यवसायिक उत्पादन गर्ने लक्ष्य राखिएकाे छ। २०८१ मा ठेक्का निकालेर निर्माणमा जाने योजना रहेकाे कम्पनीले जनाएकाे छ । यो आयोजनाबाट वार्षिक सरदर ५२१ गिगावाट घन्टा विद्युत उत्पादन गर्नेछ ।
