ऊर्जा खबर
काठमाडौं । विगत तीन दिनदेखि रसुवाको दालफेदी गाउँबाट उत्तर तर्फको जंगलमा लागेको डढेलोका कारण रसुवामा निर्माणाधीन १११ मेगावाट क्षमताको रसुवागढी जलविद्युत आयोजनामा क्षती पुगेको छ ।
जंगलमा लागेको डढेलो आयोजनाको सर्ज साफ्ट तर्फ सर्दै आएपछि पावर हाउसको एक हजार तीन सय मिटर थ्रीफेज तार पूर्ण रूपमा जलेको छ भने सर्ज साफ्ट, सर्ज टैंक तथा टेलरेस पाइपमा पनि क्षति पुगेको छ ।
आयोजनाको पावर हाउस क्षेत्रको आगो डिजी स्काभेटरले माटो, पानी हालेर नियन्त्रमा लिइएको आयोजनाको प्रशासन प्रमुख टीका पौडेलले जानकारी दिए ।
पौडेलका अनुसार उक्त क्षेत्रमा शुक्रबार बिहान ४ः३० बजे आगो नियन्त्रण भएपनि लट २ क्षेत्रको आगो नित्रन्त्रण भइ सकेको छैन । लट २ नजिकै ठेकेदार कम्पनी भोइथ हाइड्रोको हाइड्रो मेकानिकल, इलेक्ट्रो मेकानिकल, टर्वाइन लगायत महत्त्वपूर्ण सामाग्रीहरु भण्डारण गरिएको छ, सो क्षेत्रमा आगो नियन्त्रण गर्न कठिन भइरहेको छ ।
आगो नियन्त्रणमा नेपाल प्रहरी, नेपाली सेना, आयोजनाका कर्मचारीहरु, ठेकेदार कम्पनीका कर्मचारीहरु र स्थानीय बासिन्दाको सहयोगमा आगो नियन्त्रणको प्रयास भइरहेको आयोजनाले जानकारी दिएकोछ ।
आगो नियन्त्रणमा आइ नसकेकाले क्षती कति भयो भन्नेबारे यकिन नभएको पौडेलले बताए ।
