ऊर्जा खबर
काठमाडौं । सरकारले ऊर्जा, जलस्रोत तथा सिँचाइ मन्त्रालयसहित ४ जना सचिवको जिम्मेवारी हेरफेर गरेको छ । सोमबार बसेको मन्त्रिपरिषद् बैठकले यस्तो निर्णय गरेको हो ।
सरकारले ऊर्जाका सचिव दिनेशकुमार घिमिरेलाई राष्ट्रिय सतर्कता केन्द्रमा र केन्द्रका देवेन्द्र कार्कीलाई ऊर्जाको जिम्मेवारी तोकेको छ । यस्तै, वन तथा वातावरण मन्त्रालयमा डा. पेमनारायण कँडेल र बागमती प्रदेशको प्रमुख सचिवमा मुकुन्दप्रसाद पौड्यालको सरुवा भएको छ ।
ऊर्जा मन्त्रालय र मातहतका निकायमा झन्डै साढे दुई दशक विभिन्न जिम्मेवारी सम्हालेका इलेक्ट्रिकल इन्जिनियर घिमिरेलाई सम्भवतः पहिलो पटक सम्बन्धितभन्दा बाहिरको निकायमा जिम्मेवारी तोकिएको छ । उता सिभिल इन्जिनियर कार्कीले सडक विभागको महानिर्देशक हुँदै भौतिक पूर्वाधार तथा यातायात मन्त्रालय, जल तथा ऊर्जा आयोग, सतर्कता केन्द्रको सचिव हुँदै ऊर्जा सचिवको जिम्मेवारी सम्हाल्न पुगेका छन् ।
आफूले बुधबार दिउँसो मात्र ऊर्जा तथा जलस्रोत मन्त्रालयमा सरुवा भएको पत्र पाएको कार्कीले ऊर्जा खबरलाई बताए । २–३ दिनपछि अर्थात् ऊर्जाका निवर्तमान सचिव घिमिरेसँग समन्वय गरेर आफूले जिम्मेजारी सम्हाल्ने उनको भनाइ छ । उता सचिव घिमिरे भने मन्त्रालयको कामले प्रदेश १ को भ्रमणमा रहेको मन्त्रालयले जानकारी दियो ।
घिमिरे २०७५ पुस ९ गते सोमबार सचिवमा बढुवा भएका हुन् । उनको सचिवको कार्यकाल अब करिब २ वर्ष ८ महिना बाँकी छ । यस्तै, कार्कीको कार्यकाल करिब १३ महिना बाँकी छ । सरकारको विशिष्ट श्रेणी अर्थात् सचिवमा कार्यरत रहेको ५ वर्षपछि अनिवार्य अवकाश हुने प्रावधान छ ।
