ऊर्जा खबर
काठमाडौं । नेपाल विद्युत प्राधिकरणले प्राधिकरणको पोलमा दुरसञ्चार, केवल टीभी तथा इन्टरनेट सेवा प्रदायकहरूबाट तानिएको अव्यवस्थित तार हटाउन बारम्बार ताकेता गर्दा पनि अटेर गरेपछि आफै तार व्यवस्थापन गर्ने तयारी गरेको छ । प्राधिकरणले पटक–पटक सुचना जारी गरी तार हटाउन अनुरोध गरेपनि बेवास्ता गरेपछि आफै हटाउन लागेको हो ।
सेवा प्रदायकले सूचना बमोजिमको व्यवस्थापन कार्य नगरेकोले आफैं अनावश्यक, जथाभावी झुण्डिएको उपकरणहरू व्यवस्थापन गर्न लागेको प्राधिकरणले जनाएको छ । प्राधिकरणका अनुसार पहिलो चरणमा त्रिपुरेश्वर–सुन्धारा–रत्नपार्क–केशरमहल–लैनचौर–लाजिम्पाट–नारायणगोपा चोक–बुढानिलकण्ठ खण्डको अव्यवस्थित तार लगायतका उपकरणहरू हटाइनेछ ।
प्राधिकरण आगामी शनिबार (पुस ९ गते) देखि पोलमा तानिएको दुरसञ्चार, केबल टिभी तथा इन्टरनेट सेवा प्रदायकहरूबाट तानिएको केबल तथा उपकरणहरू व्यवस्थापन गर्नेछ । यसबाट हुने नोक्सानीको लागि सेवा प्रदायक स्वयम जिम्मेवारी हुने प्राधिकरणले जनाएको छ ।
प्राधिकरणले कात्तिक १५ गते र मंसिर १८ गते सूचना जारी गर्दै अनावश्यक तार तथा झुण्डाएको उपकरण हटाउन आग्रह गरेको थियो ।
