ऊर्जा खबर
काठमाडौं । सिन्धुपाल्चोकस्थित ७.५ मेगावाटको इन्द्रावती तेस्रो जलविद्युत केन्द्रको उत्पादन फेरि बन्द भएको छ । मेलम्ची नदीमा दोस्रो पटक गत साउन १८ गते आएको भीषण बाढीले विद्युत प्रवाह हुने ६६ केभी प्रसारण लाइनका २ वटा टावर बगाएपछि २ साताभन्दा बढी समयदेखि विद्युत उत्पादन बन्द हुन पुगेको हो ।
प्रसारण लाइनको समस्याले उत्पादन सुचारु भएको केही दिनपछिबाट फेरि विद्युतगृह बन्द भएको प्रवर्द्धक नेशनल हाइड्रो पावर कम्पनीका अध्यक्ष कुमार पाण्डेले बताए । ‘असार १ गतेको बाढीले बगाएको प्रसारण लाइनका टावर निर्माण गरेर डेढ महिनापछि उत्पादन सुचारु गरेका थियौं,’ उनले ऊर्जा खबरसँग भने, ‘साउन १८ गतेको बाढीले फेरि प्रसारण लाइनका २ वटा टावर बगाएपछि अहिले उत्पादन बन्द छ ।’
बाढीले बगाएका २ वटा प्रसारण लाइनका टावरको स्थानमा नयाँ टावर राख्ने जग्गाका सम्बन्धमा स्थानीयसँग छलफल तथा परामर्श भइरहेको पनि उनले बताए । प्रसारण लाइनको टावर राख्न जग्गा खरिद प्रक्रिया टुंगिएपछि निर्माण सुरु गरिने भएको छ ।
प्रसारण लाइनको काम सुरु भइनसकेकाले उत्पादन सुचारु गर्न अझै कति समय लाग्छ भन्नेबारे यकिन हुन नसकेको कम्पनीले जनाएको छ । यसअघि पनि गत असार १ गतेको बाढीले ६६ केभी प्रसारण लाइनका ५ वटा टावर बगाउँदा डेढ महिनासम्म इन्द्रवाती तेस्रोको उत्पादन बन्द हुन पुगेको थियो ।
नयाँ टावर निर्माण गरी तार तानेर प्रसारण लाइन सञ्चालनमा आएपछि विद्युत उत्पादन सुचारु गरिएको थियो । डेढ महिनासम्म विद्युत उत्पादन बन्द हुँदा कम्पनीको विद्युत बिक्रीबाट हुने ३ करोड रुपैयाँ आम्दानी गुमेको थियो । गत वर्षको बाढीले समेत जलविद्युत केन्द्रको बाँध क्षेत्रका संरचनामा क्षति पुर्याएको थियो ।
