ऊर्जा खबर
काठमाडौं । ८.५ मेगावाटको माथिल्लो हेवा खोला जलविद्युत आयोजनाले व्यापारिक उत्पादन सुरु गरेको छ । अप्पर हेवा खोला हाइड्रो पावर कम्पनीले निर्माण सम्पन्न गरेको आयोजनाले व्यापारिक उत्पादन सुरु गरेको हो ।
संखुवासभामा निर्माण सम्पन्न आयोजनाबाट उत्पादन भएको विद्युत कोशी कोरिडोर प्रसारण लाइनको बानेश्वर सबस्टेसनमा जोडिएको छ । आयोजनाले आज (बुधबार) देखि व्यापारीक उत्पादन सुरु गरेको हो ।
आयोजनाबाट गत फागुन १५ गतेदेखि उत्पादन परीक्षण सुरु भएको थियो । आयोजनाको विद्युत बानेश्वर सबस्टेसनमा जोडिएको छ । विद्युतगृहदेखि सबस्टेसनसम्म आवश्यक १०.४ किलोमिटर लामो प्रसारण लाइन प्रवद्र्धक कम्पनीले निर्माण सम्पन्न गरेको हो ।
आयोजनाबाट यसअघि नै विद्युत उत्पादन सुरु गर्ने तालिका भए पनि कोरोना (कोभिड–१९) महामारी, तथा गत बर्खामा आएको बाढीले संरचनामा क्षति पुर्याएका कारण निर्माण लम्बिँदा केही ढिलो हुन पुगेको हो ।
आयोजनाबाट वार्षिक ४६.२८ गिगावाट घन्टा विद्युत उत्पादन हुनेछ । हिउँदको उत्पादन ६.९५ र बर्खाको उत्पादन ३९.३२ गिगावाट घन्टा हुने कम्पनीले जनाएको छ ।
आयोजना सम्पन्न भई सञ्चालनमा आउँदा १ अर्ब ४१ करोड रुपैयाँ खर्च भएको छ । आयोजनामा एनएमबी बैंकको अगुवाईमा नेपाल बैंक र कृषि विकास बैंकले ७० प्रतिशत ऋण लगानी गरेका छन् ।
बाँकी ३० प्रतिशत स्वपुँजी लगानी छ । माथिल्लो हेवामा लगानी गरेको समूहले नै यसअघि साढे ४ मेगावाटको हेवा आयोजना निर्माण सम्पन्न गरी प्रणालीमा जोडिसकेको छ ।
