ऊर्जा खबर
काठमाडौं । जलविद्युतमा लगानी गर्दै आएको हाइड्रो इलेक्ट्रिसिटी इनभेष्टमेन्ट एन्ड डेभलपमेन्ट कम्पनी (एचआइडिसिएल) ले हकप्रद सेयर निष्कासन गरेको छ । कम्पनीले आज (मंगलबार) बाट शतप्रतिशत (१ः१ अनुपात) हकप्रद सेयर निष्कासन गरेको हो ।
संस्थापक र सर्वसाधारण सेयरधनीका लागि प्रतिकित्ता १ सय रुपैयाँ अंकित्त ११ अर्ब रुपैयाँ बराबरको ११ करोड कित्ता हकप्रद सेयर निष्कासन गरेको कम्पनीले जनाएको छ । कम्पनीका अनुसार लगानीकर्ताले आगामी साउन २५ गतेसम्म आवेदन दिन सक्नेछन् ।
सेयर निष्कासन गरी बाँडफाड गर्न ग्लोबल आइएमई क्यापिटललाई बिक्री प्रबन्धक नियुक्त गरिएको छ । अहिले यस कम्पनीको चुक्ता पुँजी ११ अर्ब रुपैयाँ छ । शतप्रतिशत हकप्रद सेयर निस्कासनपछि यो बढेर २२ अर्ब रुपैयाँ पुग्ने छ ।
कम्पनीले अहिले ५ वर्षे व्यावसायिक कार्ययोजना कार्यान्वयन गरिरहेको छ । जसअनुसार आव २०७८÷७९ सम्म ३ हजार ३ सय ३९ मेगावाटका २३ आयोजनाहरूमा १० अर्ब ७६ करोड रुपैयाँ स्वपुँजी लगानी गर्ने लक्ष्य राखेको छ । यस्तै, सोही अवधिमा १२ अर्ब ६७ करोड रुपैयाँ ऋण लगानी गर्ने योजना छ ।
कम्पनीले हालसम्म ४ सय ७६ मेगावाटका १३ आयोजनामा १० अर्ब ८८ करोड ऋण लगानी गरेको छ । ती मध्ये ९०.६ मेगावाटका ४ आयोजना सञ्चालनमा आइसकेका छन् ।
हालसम्म कम्पनीले १५ सय ४० मेगावाटका ५ आयोजना र ४ सम्बन्धित कम्पनीहरूमा ९ अर्ब ४५ करोड रुपैयाँ स्वपुँजी लगानी गरेको छ । पावर चाइनासँगको सहकार्यमा १ सय ५६ मेगावाटको माडी जलाशय र ७ सय ५६ मेगावाटको तमोर जलाशय निर्माण गर्न सम्झौता गरेको छ ।
.jpg)
