प्राकृतिक र प्राविधिक कारणले विद्युत् अवरोध हुनसक्छ, ११५० मा फोन गर्नुहोस् : प्राधिकरण

काठमाडौँ । नेपाल विद्युत् प्राधिकरणले प्रतिकूल मौसमका कारण हुने प्राकृतिक घटना र प्राविधिक कारणले कहिलेकाहीँ विद्युत् आपूर्तिमा अवरोध आउने भन्दै आम उपभोक्तालाई सुसूचित गरेको छ । प्राधिकरणले मंगलबार एक सूचना जारी गर्दै यस्तो जानकारी गराएको हो ।

‘प्राधिकरण आफ्ना सबै उपभोक्तालाई निरन्तर, भरपर्दो र गुणस्तरीय विद्यूत् आपूर्ति गर्न प्रतिवद्ध छ,’ सूचनामा भनिएको छ, ‘तर आँधी, चट्याङ र भारी वर्षा जस्ता प्रतिकूल मौसम तथा अन्य प्राविधिक कारणले कहिलेकाहीँ विद्युत् आपूर्तिमा अवरोध आउन सक्छ ।’

विद्युत् आपूर्तिमा प्रणालीगत अवरोध आउँदा ठूलो क्षेत्रका उपभोक्ता तथा सम्पूर्ण प्रणालीलाई नै प्रभावित पार्ने र स्थानीय अवरोध आउँदा सीमित क्षेत्र वा स्थानको आपूर्तिमा मात्रै अवरोध हुन प्राधिकरणले स्पष्ट पारेको छ ।

उल्लिखित दुई प्रकारले विद्युत् अवरोध भएमा प्राधिकरणका प्रत्येक प्रादेशिक कार्यालय तथा डिभिजन कार्यालयहरूमा सञ्चालनमा रहेका कल सेन्टरहरूमा रहेकाले हटलाइन टेलिफोन नम्बर ११५० मा पत्काल फोन गरेर जानकारी गराउन पनि प्राधिकरणले आग्रह गरेको छ । 

कल सेन्टरहरूको कार्यसम्पादन बारे जाँचबुझ गरी रायसहितको प्रतिवेदन पेश गर्न अध्ययन समिति समेत गठन गरिएको प्राधिकरणले जनाएको छ ।