ऊर्जा खबर
काठमाडौं । निजी तथा सरकारी ऊर्जा उत्पादकहरूले अध्ययन पुरा गरेका डेढ दर्जन जलविद्युत आयोजनाले निर्माण अनुमति पाएका छन् । अध्ययन पुरा भएका १७ जलविद्युत आयोजनाले विद्युत विकास विभागबाट निर्माण अनुमतिपत्र पाएका हुन् ।
विभागका अनुसार २०७९ साउनदेदेखि माघसम्मको अवधिमा ५१८.८ मेगावाटका १७ जलविद्युत आयोजनाकाे नाममा उत्पादन अनुमतिपत्र जारी गरिएको छ । अनुमति पाउनेमा सबैभन्दा ठुलो ताप्लेजुङमा अध्ययन पूरा भएकाे ७७.५ मेगावाटकाे घुन्सा खाेला रहेकाे छ । रेमिट हाइड्रो लिमिटेड प्रवर्द्धक रहेकाे आयाेजनाले साउन ४ गते अनुमति पाएकाे हाे ।
यस्तै, यही जिल्लामा सिम्बुवा रेमिट हाइड्रो लिमिटेले अध्ययन सम्पन्न गरेकाे ७०.३ मेगावाटकाे सिम्बुवा खाेलाले पनि साउन २३ गते अनुमति पाएकाे छ । ६५ मेगावाटकाे दुधखाेलाले पनि २५ गते अनुमति पाएकाे छ । याे आयाेजना सिता हाइड्रो पावर कम्पनीले अघि बढाएकाे हाे ।
एक्सपर्ट हाइड्रो इन्भेष्टमेन्ट प्रालिले अध्ययन पुरा गरेको ४४ मेगावाटको सानी भेरी जलविद्युतले २०७९ माघ १२ गते निर्माण अनुमति पाएको हो ।कास्कीमा ४३ मेगावाटको अप्पर मादी जलविद्युत आयोजना निर्माण गर्न अन्नपुर्ण पावर कम्पनी लिमिटेडले अनुमतिपत्र पाएको छ । यो आयोजनाले २०७९ भदौ ३० गते निर्माण अनुमति पाएको थियो ।
यसैगरी, ४० मेगावाटको भोटेकोसी–१, २१ मेगावाटको जल्दी गाड, १५ मेगावाटको मिडिल त्रिशुली गंगा नदी, १३ मेगावाटको मिडिल मैलुङ (क्यास्केड), २१ मेगावाटको आयु मलुन खोला, १५ मेगावाटको अप्पर काबेली-२, ३० मेगावाटको पलुन खोलम-१, २१ मेगावाटको पलुन खोला स्मल, २४ मेगावाटको लुजा खोला, ४.९ मेगावाटको अप्पर पिखुवा खोला र ९.३ मेगावाटको सिवाखोला जलविद्युत आयोजनाले निर्माण अनुमति पाएका छन् ।
निर्माण अनुमति पाएका आयोजनामध्ये सबैभन्दा सानो ३.३ मेगावाटको स्यार्पु जलविद्युत आयोजना रहेको छ । स्यार्पु पावर कम्पनी लिमिटेडले अध्ययन पुरा गरेको उक्त आयोजनाले पुस २० गते निर्माण अनुमति पाएको हो ।
